فیصل آباد،لائیو سٹاک فارمرز کو بھیڑوں کی علاقائی نسلیں پالنے کی ہدایت

جمعہ 3 اکتوبر 2025 13:40

فیصل آباد (اُردو پوائنٹ اخبارتازہ ترین - اے پی پی۔ 03 اکتوبر2025ء) محکمہ لائیو سٹاک و ڈیری ڈویلپمنٹ فیصل آباد نے ملک میں گوشت اور اون کی بڑھتی ہوئی طلب کے باعث لائیو سٹاک فارمرز اور کسانوں کو بھیڑوں کی علاقائی نسلیں پالنے کی ہدایت کی ہے۔ ایڈیشنل ڈائریکٹر محکمہ لائیو سٹاک و ڈیری ڈویلپمنٹ فیصل آباد ڈاکٹر قیصر خلیق نے کہا ہے کہ لائیو سٹاک فارمرز، مویشی پال حضرات اور کسان زیادہ گوشت اور اچھی اون کے لئے بھیڑوں کی علاقائی نسلیں پالنے کو ترجیح دیں اور اس سلسلہ میں محکمہ لائیو سٹاک کے فیلڈ سٹاف کی مشاورت کو بھی یقینی بنایا جائے تاکہ وہ زیادہ سے زیادہ مالی فائدہ حاصل کر سکیں۔

انہوں نے لائیو سٹاک فارمرز کو ہدایت کی کہ بھیڑوں کے باڑے کو سطح زمین سے 2فٹ اونچا رکھا جائے، بھیڑوں کو کرم کش ادویات ہر 4ماہ بعد پلوائی جائیں اور اون کی کترائی موسم بہار اور موسم خزاں میں سال میں 2بار کروائی جائے۔

(جاری ہے)

ا نہوں نے کہا کہ بھیڑوں اور بکریوں کو بیماریوں سے محفوظ رکھنے کے لئے محکمے کی ہدایات کے مطابق حفاظتی ٹیکے لگوائے جائیں اور حاملہ بھیڑوں کو آخری ماہ میں ریوڑ سے الگ کر کے انہیں زود ہضم غذا فراہم کی جائے۔انہوں نے کہا کہ اس ضمن میں ایک فری ہیلپ لائن بھی قائم ہے لہٰذا لائیو سٹاک فارمرز یا دیگر سٹیک ہولڈرز صبح 9سے شام 5بجے تک مذکورہ ہیلپ لائن78685 ۔ 0800پر مفت رابطہ کر سکتے ہیں۔