پاکستان کا تجارتی خسارہ پہلی سہ ماہی میں 9.36 ارب ڈالر سے تجاوز کر گیا

درآمدات میں اضافے اور برآمدات میں مسلسل کمی تجارتی خسارے کو بڑھا رہی ہے جس سے زرمبادلہ کے ذخائر اور معیشت پر دباؤ مزید بڑھ سکتا ہے، ماہرین

جمعرات 2 اکتوبر 2025 19:40

پاکستان کا تجارتی خسارہ پہلی سہ ماہی میں 9.36 ارب ڈالر سے تجاوز کر گیا

اسلام آباد(اُردو پوائنٹ اخبارتازہ ترین - آن لائن۔ 02 اکتوبر2025ء) رواں مالی سال 26-2025 کی پہلی سہ ماہی (جولائی تا ستمبر) میں پاکستان کا تجارتی خسارہ 32.92 فیصد بڑھ کر 9 ارب 36 کروڑ 80 لاکھ ڈالر تک جا پہنچا ہے۔ وفاقی ادارہ شماریات کے مطابق اس عرصے میں درآمدات میں نمایاں اضافہ جبکہ برآمدات میں کمی ریکارڈ کی گئی۔ادارہ شماریات کی رپورٹ کے مطابق جولائی تا ستمبر 2025 کے دوران درآمدات 13.49 فیصد بڑھ کر 16 ارب 97 کروڑ 10 لاکھ ڈالر تک پہنچ گئیں۔

صرف ستمبر کے مہینے میں درآمدات کا حجم 5 ارب 84 کروڑ 50 لاکھ ڈالر رہا۔

(جاری ہے)

برآمدات کے محاذ پر صورتحال منفی رہی اور پہلی سہ ماہی میں برآمدات 3.83 فیصد کمی کے بعد 7 ارب 60 کروڑ 30 لاکھ ڈالر تک محدود رہیں۔ ستمبر 2025 میں سالانہ بنیادوں پر برآمدات میں 11.71 فیصد کمی دیکھنے میں آئی، جب کہ ماہانہ برآمدات کا حجم 2 ارب 50 کروڑ 40 لاکھ ڈالر ریکارڈ ہوا۔رپورٹ میں بتایا گیا کہ ستمبر میں تجارتی خسارہ سالانہ بنیادوں پر 45.83 فیصد اور ماہانہ بنیادوں پر 16.33 فیصد بڑھ کر 3 ارب 34 کروڑ 10 لاکھ ڈالر تک پہنچ گیا۔ماہرین معیشت کا کہنا ہے کہ درآمدات میں اضافے اور برآمدات میں مسلسل کمی تجارتی خسارے کو بڑھا رہی ہے، جس سے زرمبادلہ کے ذخائر اور معیشت پر دباؤ مزید بڑھ سکتا ہے۔