استاد کی عظمت، کردار اور رتبے کا اعتراف کرنے والی اقوام ہی ترقی کی منازل طے کرتی ہیں، وفاقی وزیر داخلہ محسن نقوی

اتوار 5 اکتوبر 2025 10:40

اسلام آباد (اُردو پوائنٹ اخبارتازہ ترین - اے پی پی۔ 05 اکتوبر2025ء) وفاقی وزیر داخلہ محسن نقوی نے تمام اساتذہ کو ان کی گراں قدر خدمات پر خراج تحسین پیش کرتے ہوئے کہا ہے کہ معاشروں کی فکری بلندی، تہذیبی شائستگی اور قومی خودی استاد کی رہنمائی کی مرہونِ منت ہے۔اتوار کو اساتذہ کے عالمی دن کے موقع پر اپنے پیغام میں وفاقی وزیر داخلہ نے کہا کہ آج کا دن ان مقدس ہستیوں کے نام جنہوں نے ہر حالت میں علم کے چراغ کو اپنی محنت سے جلائے رکھا،استاد کی عظمت، کردار اور رتبے کا اعتراف کرنے والی اقوام ہی ترقی کی منازل طے کرتی ہیں۔

محسن نقوی نے کہا کہ یہ دن اُن خدمات اور قربانیوں کی یاد دلاتا ہے جو استاد اپنی ذات کی نفی کر کے نسلوں کو بامقصد بناتا ہے،معاشروں کی فکری بلندی، تہذیبی شائستگی اور قومی خودی استاد کی رہنمائی کی مرہونِ منت ہے،معلم وہ منصب ہے جو انبیائے کرام کی میراث قرار پایا ۔

(جاری ہے)

محسن نقوی نے کہا کہ نبی کریم ﷺ نے فرمایا’’ مجھے معلم بنا کر بھیجا گیا ہے‘‘ اور یہ قول استاد کے منصب کو تقدس بخشتا ہے،قرآنِ کریم نے "یُعَلِّمُهُمُ الْكِتَابَ وَالْحِكْمَةَ" فرما کر تعلیم و تربیت کے ربط کو مقدس ترین مشن بنایا۔

انہوں نے کہا کہ اللہ تعالی نے مجھے جو منصب عطا کئے اس میں میرے محترم اساتذہ کی تربیت، محنت اور لگن شامل ہے۔ انہوں نے کہا کہ میں اپنے اساتذہ کا احسان کسی طور بھی نہیں اتار سکتا،استاد نسلوں کی سوچ کی جہت، کردار کی سمت اور معاشرتی شعور عطا کرتا ہے،تاریخ گواہ ہے کہ ہر عہد کی عظمت کسی عظیم استاد کی تربیت یافتہ نسل سے جنم لیتی ہے،آئیں آج ہم اجتماعی طور پر یہ عہد کریں کہ استاد کی توقیر کو ریاستی بیانیے کا مرکزی جزو بنائیں گے،سب کو اس عزم کا اعادہ کرنا ہے کہ استاد کا احترام نظریے کے طور پر اپنائیں گے۔

Facebook Twitter Google + Share on Whatsapp

استاد کی عظمت، کردار اور رتبے کا اعتراف کرنے والی اقوام ہی ترقی کی منازل طے کرتی ہیں، وفاقی وزیر داخلہ محسن نقوی

متعلقہ عنوان :

مزید قومی خبریں