چین میں شدید برفباری کے بعد کوہ پیما ہلاک، سینکڑوں کو ریسکیو کر لیا گیا

منگل 7 اکتوبر 2025 08:50

بیجنگ (اُردو پوائنٹ اخبارتازہ ترین - اے پی پی۔ 07 اکتوبر2025ء) چین کے شمال مغربی اور مغربی پہاڑی علاقوں میں اچانک ہونے والی شدید برفباری کے بعد ایک کوہ پیما ہلاک ہو گیا ہے جبکہ سینکڑوں کو بچا لیا گیا۔اے ایف پی نے چین کے سرکاری نشریاتی ادارے سی سی ٹی وی کے حوالے سے رپورٹ کیا ہے کہ ایورسٹ کی مشرقی سمت کے قریب پھنسے ہوئے 200 سے زائد کوہ پیما اتوار کی رات تک بتدریج محفوظ مقام کی طرف روانہ ہو چکے تھے۔

چین کی آٹھ روزہ قومی تعطیلات کے دوران ملک کے مشہور قدرتی مقامات پر سیاحوں کی بڑی تعداد پہنچی، لیکن بہت سے افراد غیر متوقع اور شدید موسمی حالات کی زد میں آ گئے۔شمال مغربی چین کے صوبے چنگھائی میں واقع ٹائیگر ویلی میں ایک کوہ پیما ٹھنڈ لگنے (ہائپوتھرمیا) اور اونچائی سے متعلق بیمار کے باعث جان کی بازی ہار گیا۔

(جاری ہے)

اسی علاقے سے 130 سے زائد افراد کو بچا لیا گیا۔

ان کی تلاش کے لیے سینکڑوں ریسکیو اہلکاروں اور دو ڈرونز کو تعینات کیا گیا تھا۔رپورٹ کے مطابق، علاقے میں دیگر کوہ پیماؤں کی تلاش کا کام جاری ہے، تاہم یہ واضح نہیں کیا گیا کہ کتنے افراد ابھی تک لاپتہ ہیں۔اس کے علاوہ، تبت میں بھی 350 افراد، جو برفباری کے باعث ایک وادی میں پھنس گئے تھے، انہیں قودانگ نامی قصبے میں محفوظ مقام پر پہنچا دیا گیا ہے۔