آفات و ہنگامی حالات میں ذہنی صحت کی خدمات اولین ترجیح ہونی چاہئے، پروفیسر فاروق افضل

بدھ 15 اکتوبر 2025 15:34

لاہور (اُردو پوائنٹ اخبارتازہ ترین - اے پی پی۔ 15 اکتوبر2025ء) پرنسپل امیرالدین میڈیکل کالج پروفیسر ڈاکٹر فاروق افضل نے کہا کہ ذہنی صحت کو جسمانی صحت کے برابر اہمیت دینی چاہیے، خاص طور پر آفات اور ہنگامی حالات میں متاثرہ افراد کو بروقت ذہنی امداد فراہم کرنا نہایت ضروری ہے۔ وہ ذہنی صحت کے عالمی دن کے سلسلہ میں لاہور جنرل ہسپتال میں منعقدہ آگاہی واک اور معلوماتی سیشن سے خطاب کر رہے تھے۔

انہوں نے کہا کہ اگر ہم اپنی زندگیوں میں اسلامی اصولوں کو اپنائیں تو نہ صرف ذہنی دبا پر قابو پایا جا سکتا ہے بلکہ ایک متوازن اور صحت مند معاشرہ بھی تشکیل دیا جا سکتا ہے۔انہوں نے کہا کہ ذہنی سکون، باہمی ہمدردی اور مثبت سوچ ایک مضبوط معاشرے کی بنیاد ہیں۔ تقریب میں ایم ایس ڈاکٹر فریاد حیسن، سربراہ شعبہ نفسیات ڈاکٹر فائزہ اطہر، پروفیسر آمنہ احسن چیمہ، ڈاکٹر لیلی شفیق، ڈاکٹر ماہین رضوان، ڈاکٹر اسما گل، ڈاکٹر رافع بخاری سمیت دیگر ماہرینِ نفسیات، ڈاکٹروں، نرسوں اور ہیلتھ پروفیشنلز کی بڑی تعداد نے شرکت کی۔

(جاری ہے)

سربراہ شعبہ نفسیات ڈاکٹر فائزہ اطہرنے ذہنی بیماریوں جیسے ڈپریشن، اضطراب، پی ٹی ایس ڈی، بے خوابی اور غصے کی علامات پر روشنی ڈالتے ہوئے کہا کہ بروقت تشخیص اور علاج سے ان مسائل کا موثر حل ممکن ہے۔ ماہرین نے اس بات پر زور دیا کہ قدرتی آفات،سیلاب، جبری ہجرت، وبائیں اور جنگیں انسانوں کی ذہنی صحت پر گہرے اثرات مرتب کرتی ہیں، اس لیے لئے ان حالات میں ذہنی صحت کی خدمات کو ترجیح دی جانی چاہیے۔

ایم ایس جنرل ہسپتال پروفیسر ڈاکٹر فریاد حسین نے شعبہ نفسیات کی کوششوں کو سراہتے ہوئے کہا کہ ایسے پروگرامز معاشرے میں شعور اور ہمدردی کے فروغ میں اہم کردار ادا کرتے ہیں۔ بعدازاں پرنسپل پروفیسر ڈاکٹر فاروق افضل نے مریضوں کی عیادت کی اور انہیں تحائف بھی پیش کی۔آگاہی واک کے دوران شرکا نے مختلف پیغامات والے پلے کارڈز اٹھا رکھے تھے جن میں ذہنی صحت کو ایک بنیادی انسانی حق تسلیم کرنے، بروقت مدد کی ضرورت اور معاشرتی ہمدردی کی اہمیت پر زور دیا گیا تھا۔