وفاقی محتسب سیکرٹریٹ کی ٹیم کا لاہور ریلوے اسٹیشن کا معائنہ

جمعرات 16 اکتوبر 2025 23:30

لاہور (اُردو پوائنٹ اخبارتازہ ترین - اے پی پی۔ 16 اکتوبر2025ء) وفاقی محتسب سیکرٹریٹ، ریجنل آفس لاہور کی تین رکنی ٹیم نے جمعرات کے روز لاہور ریلوے اسٹیشن کا تفصیلی دورہ اور معائنہ کیا۔ ٹیم کی قیادت ایسوسی ایٹ ایڈوائزر سید غضنفر مہدی کر رہے تھے جبکہ گلزار احمد بٹ (اسسٹنٹ ایڈوائزر) اور محمد طاہر ضمیر (ڈپٹی ڈائریکٹر ایڈمن) ان کے ہمراہ تھے۔

معزز مہمانوں کا استقبال ڈپٹی ڈویژنل سپرنٹنڈنٹ آپریشنز محترمہ فاطمہ بلال، ڈویژنل کمرشل آفیسر عدنان مروت، ڈویژنل انجینئر تھری مرتضی اور اسٹیشن منیجر ظفر اقبال نے کیا۔دورے کے دوران ٹیم کو لاہور ریلوے اسٹیشن کی بنیادی آپریشنل سرگرمیوں، مسافروں کو فراہم کی جانے والی سہولیات، حالیہ ترقیاتی اقدامات اور مستقبل کے منصوبوں سے تفصیلا آگاہ کیا گیا۔

(جاری ہے)

بریفنگ میں بتایا گیا کہ لاہور اسٹیشن پر حال ہی میں سی آئی پی لانج برائے پلیٹ فارم نمبر 2، فیملی لانج، ایئرکنڈیشنڈ ویٹنگ ہالز، اسکلیٹرز، انفارمیشن ڈیسک، مفت وائی فائی سروس، جدید انفارمیشن اسکرینز، اور صفائی و سہولیات کے نظام میں نمایاں بہتری لائی گئی ہے۔وفاقی محتسب ٹیم نے اسٹیشن پر موجود تمام ویٹنگ ہالز، پلیٹ فارم نمبر 2 کے ریستوران، ٹک شاپ اور دیگر سہولیات کا بھی تفصیلی معائنہ کیا۔

ٹیم نے اشیائے خوردونوش کے معیار، ریٹ لسٹ اور صفائی کی صورتحال کا جائزہ لیا اور ان پر اطمینان کا اظہار کیا۔مزید برآں ٹیم نے موقع پر موجود مسافروں سے بھی ٹکٹنگ اوردیگر سہولیات سے متعلق مسائل کے بارے میں دریافت کیا، جس پر مسافروں نے مثبت تاثرات دیتے ہوئے انتظامات کو مناسب اور اطمینان بخش قرار دیا۔وفاقی محتسب ٹیم نے لاہور ریلوے انتظامیہ کی جانب سے اسٹیشن کی ترقی، سہولیات میں بہتری اور عوامی خدمت کے لیے کیے گئے اقدامات کو سراہا اور ان کوششوں کو مزید مستحکم بنانے کی تاکید کی۔