ڈیری فارمز کٹڑوں اور بچھڑوں کے راہنما اصولوں کو اپنا کر بہترین منافع حاصل کرسکتے ہیں، ڈپٹی ڈائریکٹر محکمہ لائیو سٹاک

پیر 15 دسمبر 2025 13:15

سیالکوٹ (اُردو پوائنٹ اخبارتازہ ترین - اے پی پی۔ 15 دسمبر2025ء) ڈپٹی ڈائریکٹر محکمہ لائیواسٹاک و ڈیری ڈویلپمنٹ سمبڑیال ڈاکٹر محمد افضل نے کہا ہے کہ ڈیری فارمز کٹڑوں اور بچھڑوں کے راہنما اصولوں کو اپنا کر بہترین منافع حاصل کرسکتے ہیں۔ ان خیالات کا اظہار انہوں نے آج پیر کو اے پی پی سے گفتگو کرتے ہوئے کیا۔ انہوں نے کہا کہ بہترین منافع حاصل کرنے کیلئے خریدتے وقت جانوروں کی عمر 6 ماہ سے 12 ماہ ہو ،وزن 80 سے120 کلو گرام ،جانور صحت مند ،متحرک،چکمدار آنکھیں ، جانور اچھی نسل کا ہو یعنی نیلی راوی،ساہیوال یا کراس بریڈ کا ہو۔

انہوں نے بتایا کہ خریدنے کے آغاز پر پہلے 7 دن جانور کو ہلکی خوراک دیں یعنی ایک تا ڈیڑھ کلو گرام کنسنٹریٹ، چارے میں تھوڑا گرین فیڈ اور بھوسہ، صاف پانی ہر وقت دستیاب ہونا چاہیے اور ڈیورمننگ لازمی کریں۔

(جاری ہے)

انہوں نے کہا کہ مکمل خوراک کے پلان کے مطابق جانوروں کو پہلے مہینے کنسنٹریٹ 2 سے 4 کلو روزانہ دیں،گرین فیڈ و بھوسہ،منرل مکسچر اور نمک ،مناسب چارہ اور وافر پانی مہیا کریں۔

انہوں نے کہا کہ ان صحت کا خاص خیال رکھتے ہوئے ہر 3 ماہ بعد ڈیورمنگ ضروری کریں ،ای ٹی وی ،ایل ایس ڈی اور ایف ایم ڈی کی ویکسین اپنے علاقہ کے شیڈول کے مطابق کروائیں، روزانہ جانور کا بخار ،آنکھ ،ناک ، پاخانہ چیک کریں۔انہوں نے مزید کہا کہ جانوروں کی رہائش کیلئے صاف ،خشک اور ہوا دار شیڈ کا انتخاب کریں، ہر بچھڑے کیلئے 20 سے25 اسکوائر فٹ جگہ رکھیں،فیڈ الگ دیں تاکہ سب بچھڑے مناسب خوراک حاصل کرسکیں۔

ڈاکٹر محمد افضل نے کہا کہ بچھڑوں کا ریکارڈ رکھنا بھی ایک اہم عمل ہے اس کے تحت جانور کی نشونما کا پتہ چلتا ہے، ہر بچھڑے کی صحت کا ریکارڈ رکھیں،ہر بچھڑے کے وزن اور خوراک کا ریکارڈ رکھیں اور ہر بچھڑے کی ویکسین کا ریکارڈ رکھیں۔انہوں نے کہا کہ نئے فارمر 10 بچھڑوں سے اپنا کاروبار شروع کریں، کم تجربہ کار فارمر 20 سے 30 بچھڑوں اور تجارتی سطح پر تجربہ کار فارمر 40 سے50 یا اس سے زائد بچھڑوں کا فارم تیار کرسکتے ہیں۔انہوں نے آخر میں کہا کہ ایک بچھڑا روزانہ 8 سے ایک کلوگرام وزن میں اضافہ کرتا ہے اور 90 سے120 دن کے بعد مارکیٹ میں قابل وزن حاصل کرلیتا ہے۔