ممبران قومی و صوبائی اسمبلی کا آر ڈی اے کا دورہ، اہم ترقیاتی منصوبوں کا جائزہ

ڈی جی آر ڈی اے نے راولپنڈی میں منظور شدہ، غیر منظور شدہ اور غیر قانونی ہاؤسنگ سکیموں کے بارے میں بھی آگاہ کیا

جمعہ 19 دسمبر 2025 02:10

راولپنڈی(اُردو پوائنٹ اخبارتازہ ترین - این این آئی۔ 19 دسمبر2025ء) ممبران قومی و صوبائی اسمبلی نے راولپنڈی ڈویلپمنٹ اتھارٹی کا دورہ کیا۔ اس موقع پر آر ڈی اے کے کانفرنس روم میں ایک اجلاس منعقد ہوا، جس میں ڈائریکٹر جنرل آر ڈی اے کنزہ مرتضیٰ نے اتھارٹی کی جاری منصوبہ بندی، اہم کامیابیوں اور مستقبل کے ترقیاتی اہداف پر تفصیلی بریفنگ دی۔ اجلاس میں زیر غور آنے والے بڑے جاری اور مستقبل منصوبوں میں راولپنڈی رنگ روڈ، چک بیلی روڈ کی بہتری، اسٹیڈیم روڈ پر انڈر پاس کی تعمیر، فلیش مین سے فیض آباد تک مری روڈ کی بحالی، ہائی کورٹ روڈ کی بحالی سمیت دیگر ترقیاتی سکیمیں شامل تھیں۔

ڈی جی آر ڈی اے نے راولپنڈی میں منظور شدہ، غیر منظور شدہ اور غیر قانونی ہاؤسنگ سکیموں کے بارے میں بھی آگاہ کیا اور بتایا کہ غیر قانونی ہاؤسنگ سکیموں کے خلاف بلاامتیاز اور سخت کارروائیاں جاری ہیں۔

(جاری ہے)

ڈی جی آر ڈی اے کنزہ مرتضیٰ نے اس عزم کا اعادہ کیا کہ وزیر اعلیٰ پنجاب محترمہ مریم نواز شریف کے وژن کے مطابق آر ڈی اے جدید شہری ترقی، شفافیت اور ترقیاتی منصوبوں کی بروقت تکمیل کے لیے مکمل طور پر پٴْرعزم ہے۔

ان منصوبوں سے شہر کے بنیادی ڈھانچے، ٹریفک مینجمنٹ اور عوامی سہولیات میں نمایاں بہتری آئے گی۔ ممبران قومی و صوبائی اسمبلی نے آر ڈی اے کی مجموعی کارکردگی اور افسران و عملے کی کاوشوں کو سراہا اور شہری ترقی کے عمل میں تیزی لانے پر اطمینان کا اظہار کیا۔ انہوں نے پائیدار ترقی کی اہمیت پر زور دیتے ہوئے ہدایت کی کہ مؤثر اربن پلاننگ، ماحولیاتی تحفظ اور شہری سہولیات کی بہتری کو ترجیح دی جائے تاکہ شہریوں کے معیارِ زندگی کو مزید بہتر بنایا جا سکے۔

اجلاس کے اختتام پر ترقیاتی منصوبوں کی بروقت تکمیل، بین الادارہ جاتی روابط کے فروغ اور عوامی مفاد کو ہر صورت مقدم رکھنے سے متعلق ہدایات جاری کی گئیں۔ اجلاس میں ممبران قومی اسمبلی انجینئر قمرالسلام راجہ، ملک ابرار احمد، بیرسٹر محمد عقیل جبکہ ممبران صوبائی اسمبلی راجہ عبدالحنیف، شوکت عزیز بھٹی، نعیم اعجاز، محسن ایوب خان اور عمران الیاس نے شرکت کی۔ اس کے علاوہ ڈائریکٹر انجینئرنگ آر ڈی اے محمد انور باران، چیف پلانر آر ڈی اے محمد طاہر میو، ڈائریکٹر فنانس شاہد یعقوب، ڈپٹی ڈائریکٹر انجینئرنگ محمد کامران چوہدری اور دیگر افسران بھی اجلاس میں موجود تھے۔