وزیر اطلاعات عطاء اللہ تارڑ کی میاں منظور وٹو کے انتقال پر اہلِ خانہ سے اظہار تعزیت

عطاء اللہ تارڑ نے مرحوم کی خدمات کو خراجِ تحسین پیش کیا ،درجات کی بلندی کے لیے دعائے مغفرت

ہفتہ 24 جنوری 2026 22:05

لاہور (اُردو پوائنٹ اخبارتازہ ترین - این این آئی۔ 24 جنوری2026ء) وفاقی وزیر اطلاعات عطاء اللہ تارڑ نے سابق وزیراعلیٰ پنجاب میاں منظور وٹو کے انتقال پر انکی رہائش گاہ جا کر اہلِ خانہ سے تعزیت کا اظہار کیا۔ وفاقی وزیر اطلاعات نے میاں منظور وٹو کی اہلیہ اور دیگر اہل خانہ جن میں ڈی جی پیمرا پنجاب عائشہ منظور وٹو، سابق ایم این اے روبینہ وٹو، جہاں آرا وٹو، معظم وٹو، بلال احمد ورک اور خرم وٹو شامل ہیں۔

سے دلی دکھ اور افسوس کا اظہار کیا اور میاں منظور وٹو کے ایصالِ ثواب کے لیے فاتحہ خوانی و دعائے مغفرت کی۔

(جاری ہے)

اس موقع پر وفاقی وزیر عطاے اللہ تارڑ نے کہا کہ میاں منظور وٹو ایک منجھے ہوئے سیاستدان اور عوامی خدمت کے جذبے سے سرشار رہنما تھے۔ میرے دادا، سابق صدرِ مملکت رفیق تارڑ کے ساتھ میاں منظور وٹو کا عزت و احترام کا رشتہ تھا۔منظور وٹو نے رکھ رکھا اور شائستگی پر مبنی سیاست کو فروغ دیا اور ہمیشہ برداشت، رواداری اور جمہوری اقدار کے دائرے میں رہتے ہوئے سیاسی کردار ادا کیا۔انہوں نے کہا کہ میاں منظور وٹو کی سیاسی، سماجی اور عوامی خدمات ہمیشہ یاد رکھی جائیں گی۔عطا اللہ تارڑ نے مرحوم کے درجات کی بلندی اور لواحقین کے لیے صبرِ جمیل کی دعا بھی کی۔