اسلام آباد ماڈل کالج برائے طالبات ایف سکس ٹو میں شاعر مشرق علامہ محمد اقبال کی شاعری پر مبنی بین الکلیاتی بیت بازی مقابلے کا انعقاد

جمعرات 19 فروری 2026 19:11

اسلام آباد (اُردو پوائنٹ اخبارتازہ ترین - اے پی پی۔ 19 فروری2026ء) وفاقی دارالحکومت کے تعلیمی اداروں میں جاری ادبی سرگرمیوں کے سلسلے میں اسلام آباد ماڈل کالج برائے طالبات ایف سکس ٹو میں شاعر مشرق علامہ محمد اقبال کی شاعری پر مبنی بین الکلیاتی بیت بازی مقابلے کا انعقاد کیا گیا جس میں بارہ ماڈل کالجز کی طالبات نے شرکت کی۔ بزم ادب سوسائٹی کے زیر اہتمام منعقدہ اس مقابلے میں شریک طالبات نے اقبال کے فکر انگیز اشعار سنا کر حاضرین سے بھرپور داد وصول کی اور اپنی ادبی صلاحیتوں کا مظاہرہ کیا۔

تقریب کے مہمان خصوصی معروف صحافی اور اینکر پرسن حامد میر تھے جنہوں نے طالبات کی کارکردگی کو سراہتے ہوئے کہا کہ اقبالی فکر نوجوان نسل کے لیے رہنمائی کا سرچشمہ ہے اور ایسی سرگرمیاں ان میں تخلیقی و فکری شعور کو اجاگر کرتی ہیں۔

(جاری ہے)

پروگرام کا آغاز تلاوت کلام پاک سے ہوا جس کی سعادت میمونہ رشید نے حاصل کی جبکہ عائزہ اعجاز نے نعت رسول مقبول ﷺ پیش کی۔

تقریب کی نظامت سربراہ شعبہ کیمسٹری سعدیہ وحید نے کی۔ مقابلے کے ججز میں عالیہ زرین، ڈاکٹر الیاس بابر اعوان، مریم طاہر اور ڈاکٹر عائشہ راٹھور شامل تھیں۔ مقابلے کے نتائج کے مطابق میزبان ادارے آئی ایم سی جی ایف سکس ٹو کی طالبات تحریم بابر اور طرفہ مجید نے پہلی پوزیشن حاصل کی۔ دوسری پوزیشن آئی ایم سی جی ایف سیون فور کی آمنہ زیدی اور فضہ بی بی کے حصے میں آئی جبکہ تیسری پوزیشن آئی ٹین فور ماڈل کالج کی عریشہ عثمان اور حفصہ محمود نے حاصل کی۔ بہترین انداز ترسیل کا خصوصی انعام بھی تحریم بابر کو دیا گیا۔ تقریب کے اختتام پر مہمان خصوصی نے کامیاب طالبات میں اسناد اور انعامات تقسیم کیے۔ اس موقع پر اساتذہ اور طالبات کی بڑی تعداد موجود تھی۔