بی آر ایس پی کے زیراہتمام عالمی یوم خواتین کی مناسبت سے تقریب

کوئٹہ (اُردو پوائنٹ اخبارتازہ ترین - اے پی پی۔ 11 مارچ2026ء) سیکرٹری ویمن ڈویلپمنٹ ڈیپارٹمنٹ اور صوبائی محتسب برائے انسداد ہراسگی طاہرہ بلوچ نے کہاہے کہ بلوچستان کی خواتین کو اعتماد کے ساتھ صوبے کی ترقی میں کردارادا کرناہوگا، خواتین کے تحفظ سے متعلق قوانین پر سختی سے عملدرآمدیقینی بنایاجارہاہے ۔ان خیالات کااظہار انہوں نے بدھ کو بی آر ایس پی کے زیراہتمام بی آر ایس پی آفس میں عالمی یوم خواتین کی مناسبت سے متعلق منعقدہ تقریب سے خطاب کرتے ہوئے کیا۔

تقریب کی مہمانِ خصوصی سیکرٹری ویمن ڈویلپمنٹ ڈیپارٹمنٹ حکومت بلوچستان میڈم سائرہ عطا بلوچ تھیں۔ پروگرام کا مقصد خواتین کے عالمی دن کو اپنے اسٹاف اور مختلف شعبوں سے تعلق رکھنے والے شرکا کے ساتھ منانا، دنیا بھر کی خواتین کے ساتھ اظہارِ یکجہتی کرنا اور خواتین کو درپیش مسائل پر گفتگو کے ذریعے ان کے حل کی جانب توجہ دلانا تھا۔

(جاری ہے)

پروگرام کی میزبانی بلوچستان رورل سپورٹ پروگرام کی سینئر منیجر جینڈر میڈم سائمہ ہارون نے کی۔

انہوں نے معزز مہمانوں اور شرکا کو خوش آمدید کہا اور اپنے خطاب میں کہا کہ خواتین کا عالمی دن ہمیں یہ موقع فراہم کرتا ہے کہ ہم نہ صرف خواتین کی کامیابیوں کو سراہیں بلکہ ان مسائل اور چیلنجز پر بھی بات کریں جن کا خواتین کو معاشرے میں سامنا ہے۔ انہوں نے بتایا کہ بی آر ایس پی کی جانب سے کوئٹہ سمیت بلوچستان کے مختلف اضلاع میں خواتین کے عالمی دن کے حوالے سے مختلف سرگرمیاں منعقد کی گئیں تاکہ اس دن کی اہمیت کو اجاگر کیا جا سکے اور خواتین کے حقوق اور بااختیاری کے حوالے سے آگاہی پیدا کی جا سکے۔

تقریب میں سیکرٹری ویمن ڈویلپمنٹ میڈم سائرہ عطا بلوچ، صوبائی محتسب برائے انسدادِ ہراسگی میڈم طاہرہ بلوچ، چیف ایگزیکٹو آفیسر بی آر ایس پی ڈاکٹر طاہر رشید، سینئر منیجر نعمت اللہ خان، ماہرِ نفسیات میڈم ہما عطا (وومن اینڈ جووینائل فیسلٹیشن سینٹر کوئٹہ)، منیجر وومن ہیلپ لائن اشفاق احمد، سینئر صحافی میر بہرام بلوچ، امتیاز احمد، میر بہرام لہڑی، نیشنل کمیشن فار ہیومن رائٹس کے نمائندے علی رضا اور بی آر ایس پی کے مختلف منصوبوں سے وابستہ خواتین و مرد اسٹاف نے شرکت کی۔

تقریب سے خطاب کرتے ہوئے بی آر ایس پی کے چیف ایگزیکٹو آفیسر ڈاکٹر طاہر رشید نے کہا کہ وہ ادارے کی خواتین سٹاف اور دیگر شرکا کو مبارکباد پیش کرتے ہیں۔ انہوں نے کہا کہ بی آر ایس پی اپنے ادارے میں خواتین کی شمولیت کو اہمیت دیتا ہے اور ہر سطح پر خواتین کو مساوی مواقع فراہم کیے جا رہے ہیں۔تقریب کے دیگر مقررین نے بھی خواتین کی شمولیت کو معاشرتی اور معاشی ترقی کے لیے ناگزیر قرار دیتے ہوئے اس بات پر زور دیا کہ خواتین کے حقوق کے تحفظ کے لیے بنائے گئے قوانین پر موثر عملدرآمد اور عوامی آگاہی نہایت ضروری ہے۔

پروگرام کے اختتام پر مہمانِ خصوصی میڈم سائرہ عطا بلوچ اور صوبائی محتسب میڈم طاہرہ بلوچ کو ان کی خدمات کے اعتراف میں یادگاری شیلڈز پیش کی گئیں، جبکہ شرکا نے خواتین کے عالمی دن کے پیغام کو آگے بڑھانے اور خواتین کی بااختیاری کے لیے مشترکہ کوششیں جاری رکھنے کے عزم کا اظہار کیا۔