وزیرامور کشمیر و گلگت بلتستان انجینئر امیر مقام اور وزیر اعلی گلگت بلتستان کے مابین اہم ملاقات

گلگت بلتستان میں پائیدار امن کے قیام کو ہر صورت یقینی بنایا جائے گا ، امن دشمن عناصر کو بے نقاب کر کے قانون کے کٹہرے میں لانے کا عزم

اتوار 29 مارچ 2026 12:25

گلگت (اُردو پوائنٹ اخبارتازہ ترین - این این آئی۔ 29 مارچ2026ء) گلگت بلتستان کی موجودہ صورتحال اور خطے کی ترقی کے حوالے سے وفاقی وزیر برائے امور کشمیر و گلگت بلتستان انجینئر امیر مقام اور وزیر اعلی گلگت بلتستان جسٹس(ر)یار محمد کے مابین اہم ملاقات ہوئی۔اس دوران سیکرٹری امور کشمیر و گلگت بلتستان ظفر حسن بھی موجود تھے۔ ملاقات کے دوران خطے کی مجموعی امن و امان کی صورتحال، حالیہ پیش آنے والے ناخوشگوار واقعات و دیگر امور پر تفصیلی تبادلہ خیال کیا گیا۔

ملاقات میں اس عزم کا اظہار کیا گیا کہ گلگت بلتستان میں پائیدار امن کے قیام کو ہر صورت یقینی بنایا جائے گا اور امن کے دشمن عناصر کو بے نقاب کر کے قانون کے کٹہرے میں لایا جائے گا۔اس موقع پر انجینئر امیر مقام نے وفاقی حکومت کی جانب سے گلگت بلتستان کی تعمیر و ترقی کے لیے ہر ممکن تعاون کی یقین دہانی کرائی۔

(جاری ہے)

وفاقی وزیر انجینئر امیر مقام نے کہا کہ وزیرِ اعظم میاں محمد شہباز شریف کی قیادت میں حکومت ملک کے تمام علاقوں بالخصوص گلگت بلتستان کی ترقی اور خوشحالی کو اولین ترجیح دے رہی ہے۔

انہوں نے کہا کہ حکومت خطے میں بنیادی ڈھانچے کی بہتری، سیاحت کے فروغ، تعلیم اور صحت کے شعبوں کی ترقی کے لیے خصوصی اقدامات اٹھا رہی ہے تاکہ مقامی عوام کو بہتر سہولیات میسر آ سکیں۔وزیر اعلی گلگت بلتستان جسٹس (ر)یار محمد نے وفاقی حکومت کے تعاون کو سراہتے ہوئے کہا کہ مشترکہ کوششوں سے نہ صرف امن و امان کی صورتحال مزید بہتر ہوگی بلکہ ترقیاتی منصوبوں کی رفتار بھی تیز ہوگی، جس سے خطے کے عوام کو براہ راست فائدہ پہنچے گا۔

ملاقات میں اس بات پر بھی اتفاق کیا گیا کہ نوجوانوں کے لیے روزگار کے مواقع پیدا کرنے، سرمایہ کاری کو فروغ دینے اور سیاحت کے شعبے کو مزید مستحکم کرنے کے لیے مربوط حکمت عملی اپنائی جائے گی۔ ملاقات میں اس عزم کا بھی اعادہ کیا کہ گلگت بلتستان کو ایک پرامن، خوشحال اور ترقی یافتہ خطہ بنانے کے لیے تمام دستیاب وسائل بروئے کار لائے جائیں گے -