لاپتا افراد کیس، ایئرپورٹ سی سی ٹی وی صلاحیت محدود ہونے کا انکشاف

عدالت نے ایئرپورٹ سیکیورٹی فورس کو نوٹس جاری کرتے ہوئے 11 جون تک تفصیلی رپورٹ طلب کر لی

جمعرات 30 اپریل 2026 23:24

کراچی(اُردو پوائنٹ اخبارتازہ ترین - این این آئی۔ 30 اپریل2026ء) سندھ ہائی کورٹ کے آئینی بینچ میں لاپتا افراد کی بازیابی سے متعلق درخواستوں کی سماعت کے دوران اہم انکشاف سامنے آیا کہ کراچی ایئرپورٹ حکام کے پاس سی سی ٹی وی ویڈیوز صرف 25 روز تک محفوظ رکھنے کی صلاحیت موجود ہے۔

(جاری ہے)

سماعت کے دوران دبئی سے ڈی پورٹ ہونے والے شہری نوید انور کے کیس میں تفتیشی افسر نے عدالت کو بتایا کہ مذکورہ شہری نے دبئی میں سوشل میڈیا پر ویڈیو اپلوڈ کی تھی، جس پر وہاں کی حکومت نے اسے ایک سال سات ماہ قید کی سزا سنائی تھی۔

سزا مکمل ہونے کے بعد اسے کراچی ڈی پورٹ کیا گیا۔وکیل جبران ناصر نے عدالت کو بتایا کہ نوید انور کی کراچی ایئرپورٹ پر موجودگی کی تصویر ایمیگریشن کانٹر پر موجود ہے۔ تفتیشی افسر کے مطابق درخواست گزار نے واقعے کے نو ماہ بعد عدالت سے رجوع کیا۔عدالت نے ایئرپورٹ سیکیورٹی فورس کو نوٹس جاری کرتے ہوئے 11 جون تک تفصیلی رپورٹ طلب کر لی۔ مزید برآں، عدالت نے 9 لاپتا افراد کی بازیابی کے بعد متعلقہ درخواستیں نمٹا دیں، جبکہ دیگر کیسز میں مختلف تاریخوں پر رپورٹس طلب کر لی گئی ہیں۔