سپیس ایکس نے امریکی انٹیلی جنس کے لیے سیٹلائٹس مدار میں بھیج دیئے

منگل 12 مئی 2026 09:54

نیویارک (اُردو پوائنٹ اخبارتازہ ترین - اے پی پی۔ 12 مئی2026ء) سپیس ایکس نے امریکی انٹیلی جنس کے لیے سیٹلائٹس مدار میں بھیج دیئے ۔تا س کے مطابق امریکی خلائی کمپنی سپیس ایکس نے امریکی نیشنل ریکونیسنس آفس (این آراو) کے لیے جاسوسی سیٹلائٹس لے جانے والا فالکن 9 راکٹ کامیابی سے خلا میں روانہ کر دیا۔کمپنی کے مطابق این آر او ایل-172 مشن کے تحت راکٹ کو امریکی ریاست کیلیفورنیا میں واقع وینڈن برگ اسپیس فورس بیس سے مقامی وقت کے مطابق شام 7 بج کر 13 منٹ پر لانچ کیا گیا۔

(جاری ہے)

لانچ کے چند منٹ بعد راکٹ کا پہلا مرحلہ کامیابی کے ساتھ زمین پر واپس اتار لیا گیا، جو اس بوسٹر کا نویں مرتبہ استعمال تھا۔ اسپیس ایکس کے مطابق اس ٹیکنالوجی سے راکٹ لانچنگ کے اخراجات میں نمایاں کمی آتی ہے۔یہ رواں سال 2026 میں نیشنل ریکونیسنس آفس کے لیے اسپیس ایکس کا دوسرا مشن ہے۔امریکی نیشنل ریکونیسنس آفس امریکی جاسوسی سیٹلائٹس کے نظام کی نگرانی کرتا ہے، تاہم ادارے کی سرگرمیاں انتہائی خفیہ رکھی جاتی ہیں۔ اسی وجہ سے لانچ کیے گئے سیٹلائٹس کی تکنیکی تفصیلات اور نوعیت بھی ظاہر نہیں کی گئیں۔