پاکستان بزنس کونسل شارجہ اور انڈونیشیا کے درمیان تجارتی تعاون بڑھانے پر اتفاق

اعجاز احمد گوندل جمعہ 31 جولائی 2026 17:53

عجمان: پاکستان بزنس کونسل شارجہ (PBCS) نے جمہوریہ انڈونیشیا کے متحدہ عرب امارات میں سفیر جودھا نگرہا اور دبئی میں انڈونیشیا کے قونصل جنرل ڈینی لیسمانا سے اعلیٰ سطحی ملاقات کی، جس میں پاکستان اور انڈونیشیا کے درمیان تجارت، سرمایہ کاری اور کاروباری روابط کے فروغ پر اتفاق کیا گیا۔ پاکستان بزنس کونسل شارجہ کے وفد کی قیادت سینئر وائس چیئرمین سید سلیم اختر نے کی، جبکہ وائس چیئرمین عامر حسن بھی وفد میں شریک تھے۔

ملاقات کے دوران پاکستان بزنس کونسل شارجہ کے کردار، کامیابیوں اور متحدہ عرب امارات میں پاکستانی کاروباری برادری کے لیے جاری اقدامات پر بھی روشنی ڈالی گئی۔ دونوں فریقوں نے شارجہ میں پاکستان اور انڈونیشیا کی کاروباری برادری کے درمیان مشترکہ بزنس نیٹ ورکنگ سیشن کے انعقاد اور باہمی تعاون کو فروغ دینے کے لیے مفاہمتی یادداشت (MoU) پر دستخط کرنے پر اصولی اتفاق کیا۔

(جاری ہے)

مجوزہ معاہدے کا مقصد تجارت، سرمایہ کاری، کاروباری روابط اور دونوں ممالک کے تاجروں کے لیے نئے مواقع پیدا کرنا ہے۔ اس موقع پر سینئر وائس چیئرمین سید سلیم اختر نے کہا کہ پاکستان اور انڈونیشیا کے برادرانہ تعلقات باہمی احترام اور اعتماد پر مبنی ہیں، جبکہ پاکستان بزنس کونسل شارجہ دونوں ممالک کی کاروباری برادریوں کے درمیان مضبوط پل کا کردار ادا کرنے کے لیے پُرعزم ہے۔

انڈونیشیا کے سفیر جودھا نگرہا نے پاکستان بزنس کونسل شارجہ کی کاوشوں کو سراہتے ہوئے کہا کہ انڈونیشیا پاکستان کے ساتھ نجی شعبے میں تعاون کو مزید وسعت دینا چاہتا ہے اور مجوزہ بزنس فورم اور مفاہمتی یادداشت دونوں ممالک کے درمیان اقتصادی تعاون کو نئی جہت فراہم کریں گے۔ ملاقات کے اختتام پر دونوں فریقوں نے باقاعدہ رابطے برقرار رکھنے اور مشترکہ کاروباری اقدامات کے ذریعے پاکستان اور انڈونیشیا کے درمیان تجارتی و اقتصادی تعلقات مزید مضبوط بنانے کے عزم کا اظہار کیا۔