صوبہ اپنے معدنی و قدرتی وسائل کی بدولت تیزی سے بین الاقوامی سرمایہ کاروں کےلئے ایک مرکز کے طور پر ابھر رہا ہے گورنر بلوچستان

پیر 25 مئی 2026 17:43

کوئٹہ (اُردو پوائنٹ اخبارتازہ ترین - اے پی پی۔ 25 مئی2026ء) گورنر بلوچستان جعفرخان مندوخیل نے کہا کہ بلوچستان اپنے معدنی اور قدرتی وسائل کی بدولت تیزی سے تمام قومی اور بین الاقوامی سرمایہ کاروں کےلئے ایک مرکز کے طور پر ابھر رہا ہے۔ انہوں نے چین کے صوبہ ہنان کے دورے کے موقع پر منعقدہ تقریب سے خطاب کرتے ہوئے کہا کہ صوبہ بلوچستان زراعت، ماہی گیری، لائیو سٹاک، ہائیر ایجوکیشن اور آرٹیفیشل انٹیلی جنس میں سرمایہ کاری کے مواقع فراہم کرتا ہے۔

ہم دنیا بھر کے سرمایہ کاروں کو ان دستیاب مواقع سے استفادہ کرنے اور نئے امکانات تلاش کرنے کی دعوت دیتے ہیں۔ آپ کی سرمایہ کاری سے نہ صرف سرمایہ میں اضافہ ہوگا بلکہ مقامی معیشت کو تقویت ملے گی، نوجوانوں کے لئے روزگار کے مواقع پیدا ہوں گے اور اس کے عوام کا معیار زندگی بہتر ہو گا۔

(جاری ہے)

تقریب میں متعلقہ حکام نے گورنر بلوچستان کو صوبہ ہنان کے بڑھتے ہوئے قابل تجدید توانائی کے شعبے، جدید ٹیکنالوجی اور تعاون کے ممکنہ شعبوں سے متعلق بریفنگ دی۔

گورنر بلوچستان نے ہائیر ایجوکیشن کی ترقی اور خاص طور پر پیشہ ورانہ تربیتی شراکت داری میں پیش رفت پر زور دیا۔ قبل ازیں سابق وزیر اعلیٰ بلوچستان ڈاکٹر عبدالمالک بلوچ اور وزیر اعلیٰ بلوچستان کے فوکل پرسن بایزید خان کاسی نے بھی تقریب سے خطاب کیا۔تقریب میں چین کی جانب سے ممبر آف سٹینڈنگ کمیٹی کمیونسٹ پارٹی آف چائنا اور صوبہ ہنان کے ایگزیکٹو وائس گورنر ژانگ من ،صوبہ ہنان کے خارجہ امور کے ڈائریکٹر جنرل لیانگ جیئی،صوبہ ہنان کے جیولوجیکل بیورو کے ڈائریکٹر جنرل شی ینگ جون ،صوبہ ہنان کے ڈویلپمنٹ اینڈ اصلاحی کمیشن کے ڈپٹی ڈائریکٹروان ژان ویئی ، صوبہ ہنان کے ایجوکیشن ڈیپارٹمنٹ کے ڈپٹی ڈائریکٹریانگ گوانگ،صوبہ ہنان کے کامرس ڈیپارٹمنٹ کے ڈپٹی ڈائریکٹر سونگ یوژہی موجود تھے ۔