سلمان خان سے جڑے کیس پر مبنی فلم کالا ہرن کو پہلا بڑا دھچکا لگ گیا

یہ فلم اداکار کے خلاف چلنے والے کالا ہرن شکار کیس پر مبنی ہے اور اس میں سلمان خان کی شخصیت کا غلط استعمال کیا جا رہا ہے

پیر 15 جون 2026 11:00

ممبئی (اُردو پوائنٹ اخبارتازہ ترین - این این آئی۔ 15 جون2026ء) بولی وڈ سپر اسٹار سلمان خان سے جڑے کیس کی کہانی پر مبنی فلم کالا ہرن کی کاسٹ میں شامل نامور اداکار گووند نامدیو نے پروجیکٹ سے راہیں جدا کر لیں۔گووند نامدیو نے کالا ہرن کے بنانے والوں پر سنگین الزامات عائد کرتے ہوئے کہا کہ انہیں اس پروجیکٹ کے حوالے سے گمراہ کیا گیا۔ اداکار نے دعوی کیا کہ فلم پر دستخط کرتے وقت انہیں جو کہانی سنائی گئی تھی وہ اس کہانی سے بالکل مختلف تھی جس پر بعد میں شوٹنگ کی گئی۔

انڈین میڈیا کو دیے گئے انٹرویو میں گووند نامدیو نے انکشاف کیا کہ انہیں ابتدا میں بتایا گیا تھا کہ وہ سنبھل نامی فلم میں کام کر رہے ہیں لیکن بعد میں انہیں کہا گیا کہ فلم کا نام کالا ہرن ہوگا اور اس میں صرف سلمان خان کے کیس سے متعلق عدالتی کارروائی دکھائی جائے گی۔

(جاری ہے)

انہوں نے بتایا کہ میں کبھی بھی ایسی کسی چیز کا حصہ نہیں بنوں گا جس میں سلمان خان کو نشانہ بنایا جا رہا ہو، وہ میرا قریبی دوست ہے اور اگر مجھے ذرا بھی اندازہ ہوتا کہ اصل میں کیا فلمایا جا رہا ہے تو میں اس پروجیکٹ پر کبھی دستخط نہ کرتا۔

اداکار نے بتایا کہ جب انہوں نے پہلی بار فلم کیلیے ہامی بھری تھی تو وہ اس کے اصل اسکرپٹ سے بالکل بے خبر تھے، بعد میں انہیں بتایا گیا کہ ایک الگ فلم کالا ہرن بنائی جا رہی ہے جس میں صرف وہی دکھایا جائے گا جو عدالت کے اندر سلمان خان کے کیس کے سلسلے میں ہوا تھا۔گووند نامدیو نے وضاحت کرتے ہوئے کہا کہ مجھے بتایا گیا تھا کہ فلم میں صرف ایک طویل عدالتی کارروائی ہے اور مجھے بس یہی کرنا ہے، یہ بھی یقین دہانی کروائی گئی تھی کہ ہماری طرف سے کہانی میں کوئی نئی چیز شامل نہیں کی جا رہی، ہمیں صرف وہی دکھانا تھا جو عدالتی ریکارڈ کا حصہ ہے، میں نے سوچا کہ اگر صرف وہی چیزیں دکھائی جا رہی ہیں جو آن ریکارڈ موجود ہیں تو اس میں کوئی برائی نہیں اسی لیے میں نے ہاں کہہ دیا۔

انہوں نے واضح کیا کہ وہ بشنوئی گینگ کے ساتھ اپنا نام جوڑنے کا تصور بھی نہیں کر سکتے۔واضح رہے کہ یہ تمام صورتحال اس وقت پیدا ہوئی جب سلمان خان کی قانونی ٹیم نے فلم کالا ہرن کے میکرز کو ایک قانونی نوٹس بھیجا جس میں الزام لگایا گیا کہ یہ فلم اداکار کے خلاف چلنے والے کالا ہرن شکار کیس پر مبنی ہے اور اس میں سلمان خان کی شخصیت کا غلط استعمال کیا جا رہا ہے۔