بی جے پی حکومت کے غیر آئینی اقدامات کے خلاف ملک گیر تحریک چلائی جائے گی، جماعت اسلامی ہند

بدھ 24 جون 2026 12:09

نئی دلی (اُردو پوائنٹ اخبارتازہ ترین - اے پی پی۔ 24 جون2026ء) جماعت اسلامی ہند نے کہا ہے کہ بی جے پی حکومت کی طرف سے ملک میں کیے جانے والے غیر آئینی اقدامات کےخلاف ملک گیر تحریک چلائی جائے گی جس میں وہ ہندوبھائی بھی شامل ہوں گے جو انصاف اور آئینی اصولوں کی حمایت کرتے ہیں۔

(جاری ہے)

کشمیر میڈیاسروس کے مطابق جماعت اسلامی ہند کے نائب امیر معتصم خان نے ایک خبر رساں ادارے سے گفتگو کرتے ہوئے کہا کہ بی جے پی حکومت ملک میں ایکسان سول کوڈ نافذ کر رہی ہے ، گجرات اور اتر اکھنڈ میں اس کا نفاذ ہو چکا ہے جبکہ آسام میں بھی یہ عمل آگے بڑھ چکا ہے ، مدھیہ پردیش میں بھی اس کی تیاریاں جاری ہیں۔

انہوں نے کہا کہ ملک کے مختلف حصوں میں مساجد کو منہدم کیا جا رہا ہے ، مسلمانوں کو بلا وجہ گرفتار کیا جا رہا ہے اور انہیں آسانی سے ضمانت نہیں ملتی جس کی وجہ سے ہر طرف خوف و دہشت کا ماحول ہے۔انہوں نے کہا کہ اس صورتحال میں ایک ایسی تحریک چلانے کی ضرورت ہے جس سے لوگوں کا اعتماد بحال ہو اور وہ سکھ کا سانس لے سکیں۔ انہوں نے کہا کہ مسلم پرسنل لابورڈ نے تحریک چلانے کا اعلان کر دیا ہے جو ایک اچھی بات ہے ۔ انہوں نے کہا کہ اس نوعیت کا کام کیا جانا ضروری تھا ۔