اجے دیوگن کی فلم چوہان کے ٹیزر پر شدید تنقید، صارفین کا فلم کے بائیکاٹ کا مطالبہ

بدھ 1 جولائی 2026 23:12

ممبئی (اُردو پوائنٹ اخبارتازہ ترین - آن لائن۔ 01 جولائی2026ء) بالی ووڈ اداکار اجے دیوگن کی آنے والی فلم چوہان کا ٹیزر جاری ہونے کے بعد شدید تنازع کھڑا ہوگیا ہے۔سوشل میڈیا صارفین، انسانی حقوق کے حامیوں اور کشمیر کی بعض سیاسی جماعتوں نے ٹیزر کو مقبوضہ کشمیر میں پیلٹ گن متاثرین کے زخموں کو معمولی ظاہر کرنے پر سخت تنقید کا نشانہ بنایا ہے۔ٹیزر میں ایک نوجوان کو احتجاج کے دوران آنکھوں میں پیلٹ لگتے ہوئے دکھایا گیا ہے، جبکہ پس منظر میں اجے دیوگن کی آواز سنائی دیتی ہے، جس میں ان چوٹوں کو محدود نقصان قرار دیا جاتا ہے۔

یہ مکالمہ سامنے آتے ہی سوشل میڈیا پر شدید ردعمل دیکھنے میں آیا۔ناقدین کا کہنا ہے کہ پیلٹ گن سے متاثر ہونے والے ہزاروں کشمیریوں کی تکالیف اور مستقل معذوری کو اس انداز میں پیش کرنا ناصرف حقائق کے منافی بلکہ متاثرین کی توہین کے مترادف ہے۔

(جاری ہے)

رپورٹس کے مطابق 2010ء سے 2016ء کے درمیان مقبوضہ کشمیر میں 10 ہزار سے زائد افراد پیلٹ گن سے زخمی ہوئے، جبکہ صرف جولائی سے اکتوبر 2016 کے دوران ہونے والے احتجاج میں تقریباً 6 ہزار افراد متاثر ہوئے۔

ان میں سے 782 افراد کی آنکھوں پر پیلٹ لگے اور متعدد افراد ایک یا دونوں آنکھوں کی بینائی سے محروم ہوگئے۔سوشل میڈیا پر کئی صارفین نے فلم کے بائیکاٹ کا مطالبہ بھی کیا۔ ایک صارف نے لکھا پیلٹ گن کو محدود نقصان کہنا ان ہزاروں نوجوانوں کی تکلیف کا مذاق اڑانے کے مترادف ہے جنہوں نے اپنی بینائی کھو دی۔کئی صارفین نے کشمیری متاثرین، جن میں حبا نثار اور انشاء مشتاق جیسے کیسز شامل ہیں، کا حوالہ دیتے ہوئے کہا کہ پیلٹ گن کے اثرات کو معمولی قرار دینا حقیقت کے برعکس ہے۔

بعض صارفین نے فلم کو پروپیگنڈا فلم قرار دیتے ہوئے اس کے مقصد اور وقت پر بھی سوالات اٹھائے، جبکہ جموں و کشمیر کی بعض علاقائی سیاسی جماعتوں نے بھی ٹیزر پر اعتراض کرتے ہوئے کہا کہ یہ متاثرین کے حقیقی تجربات کو نظرانداز کرتا ہے۔دوسری جانب، ایک تحقیقی مطالعے کے مطابق پیلٹ گن سے زخمی ہونے والے افراد میں ذہنی صحت کے مسائل کی شرح نمایاں طور پر زیادہ دیکھی گئی۔تحقیق کے مطابق ایسے متاثرین میں ڈپریشن، ایڈجسٹمنٹ ڈس آرڈر، پینک ڈس آرڈر، پوسٹ ٹرامیٹک اسٹریس ڈس آرڈر اور جنرلائزڈ اینگزائٹی ڈس آرڈر جیسے نفسیاتی عوارض عام پائے گئے۔