سندھ حکومت کا پہلی سندھ اسپورٹس پالیسی متعارف کرانے کا فیصلہ

جمعرات 16 جولائی 2026 21:46

کراچی(اُردو پوائنٹ اخبارتازہ ترین - این این آئی۔ 16 جولائی2026ء) سندھ حکومت نے پہلی سندھ اسپورٹس پالیسی متعارف کرانے، سندھ یوتھ کارڈ کے اجرائ کے عمل کو تیز کرنے اور سندھ اسپورٹس بورڈ کو مزید فعال بنانے کا فیصلہ کر لیا ہے۔یہ فیصلہ وزیر کھیل و امور نوجوانان سندھ سردار محمد بخش مہر کی زیر صدارت منعقدہ اہم اجلاس میں کیا گیا، جس میں سیکریٹری کھیل منور علی مہیسر، ایڈیشنل سیکریٹری اسد اسحاق، چیف انجینئر محمد اسلم مہر، ڈپٹی ڈائریکٹر حبیب اللہ اور دیگر متعلقہ افسران نے شرکت کی۔

اجلاس میں سندھ اسپورٹس پالیسی، سندھ اسپورٹس بورڈ اور سندھ یوتھ کارڈ سے متعلق تفصیلی بریفنگ دی گئی. اجلاس سے خطاب کرتے ہوئے وزیر کھیل سردار محمد بخش مہر نے کہا کہ سندھ یوتھ کارڈ کے ذریعے صوبے کے 30 اضلاع کے 15 سے 29 سال عمر کے ایک لاکھ نوجوانوں کو مختلف سہولیات فراہم کی جائیں گی۔

(جاری ہے)

انہوں نے کہا کہ یوتھ کارڈ کے تحت نوجوانوں کو تعلیمی اسکالرشپس، کاروبار کے لیے بلا سود قرضے، مالی معاونت، عالمی معیار کی اسکلز ٹریننگ اور سفری سہولیات سمیت مختلف شعبوں میں ممکنہ خصوصی رعایات فراہم کی جائیں گی. انہوں نے کہا کہ چیئرمین بلاول بھٹو زرداری کی ہدایت پر سندھ یوتھ کارڈ کی تمام تیاریاں مکمل کر لی گئی ہیں اور یہ منصوبہ جلد نوجوانوں کے لیے متعارف کرایا جائے گا۔

وزیر کھیل نے محکمہ امور نوجوانان کو نوجوانوں کے لیے مزید فلاحی اور ترقیاتی پروگرام متعارف کرانے کی بھی ہدایت دی۔سردار محمد بخش مہر نے کہا کہ مجوزہ سندھ اسپورٹس پالیسی صوبے میں کھیلوں اور کھلاڑیوں کے لیے ایک نئے دور کا آغاز ثابت ہوگی۔ ان کے مطابق اس پالیسی کے ذریعے قدیم و جدید کھیلوں کے فروغ، کھلاڑیوں کی فلاح، کھیلوں کے انفرا اسٹرکچر کی توسیع، اسپورٹس ایسوسی ایشنز کی رجسٹریشن کے طریقہ کار کا تعین اور اسکولوں و کالجوں میں کھیلوں کی سرگرمیوں کو ازسرنو فعال بنایا جائے گا۔

اجلاس میں سیکریٹری کھیل منور علی مہیسر نے بریفنگ دیتے ہوئے بتایا کہ مجوزہ سندھ اسپورٹس پالیسی پر محکمہ تعلیم، کالجز، جامعات و بورڈز، صحت، قانون، ڈی پی ڈی اور سندھ اولمپک ایسوسی ایشن سمیت متعلقہ اداروں سے تجاویز طلب کی گئی ہیں۔وزیر کھیل نے کہا کہ 18ویں آئینی ترمیم کے بعد کھیل صوبائی موضوع ہے، اسی تناظر میں سندھ حکومت ایک جامع اور جدید اسپورٹس پالیسی مرتب کر رہی ہے۔ انہوں نے بتایا کہ پہلی سندھ اسپورٹس پالیسی منظوری کے لیے سندھ کابینہ میں پیش کی جائے گی، جس کے بعد اسے نافذالعمل بنایا جائے گا۔