دنیا کیلئے ستارہ امتیاز یافتہ اداکارہ و براڈ کاسٹر، میرے لئے صرف امی تھیں، فاران طاہر کا والدہ کی پہلی برسی پرپیغام

والدہ نے خاموشی سے مضبوطی، دیانت داری اور فراخ دلی کیساتھ زندگی گزاری ،یہی خوبیاں انہیں جاننے والے ہر شخص پر گہرا اثر چھوڑ گئیں، اداکار

پیر 20 جولائی 2026 23:56

کراچی (اُردو پوائنٹ اخبارتازہ ترین - این این آئی۔ 20 جولائی2026ء) اداکار فاران طاہر نے والدہ، معروف براڈکاسٹر، اداکارہ اور مصنفہ یاسمین طاہر کی پہلی برسی کے موقع پر انہیں جذباتی انداز میں خراجِ عقیدت پیش کیا ہے۔سوشل میڈیا سائٹ انسٹا گرام پر جاری بیان فاران طاہر نے تصویر شیئر کرتے ہوئے کہا کہ آج بھی یہ حقیقت عجیب محسوس ہوتی ہے کہ میری والدہ اب صرف ایک فون کال کی دوری پر نہیں رہیں، دنیا انہیں یاسمین طاہر کے نام سے جانتی تھی، ایک باصلاحیت اداکارہ، ریڈیو پاکستان کی منفرد آواز، مصنفہ، میزبان اور ستارہ امتیاز سے نوازی جانے والی شخصیت، مگر میرے لیے وہ صرف میری امی تھیں۔

انہوں نے لکھا ہے کہ امی نے مجھے سکھایا کہ مہربانی کمزوری نہیں ہوتی، عزتِ نفس وہ خوبی ہے جو انسان ہر حال میں اپنے ساتھ رکھتا ہے اور زندگی میں انسان کے چھوڑے ہوئے کاموں سے زیادہ اہم وہ لوگ ہوتے ہیں جن کی زندگیوں کو وہ بہتر بنا جاتا ہے۔

(جاری ہے)

انہوں نے بتایا کہ والدہ نے خاموشی سے مضبوطی، دیانت داری اور فراخ دلی کے ساتھ زندگی گزاری اور ان کی یہی خوبیاں انہیں جاننے والے ہر شخص پر گہرا اثر چھوڑ گئیں۔

فاران طاہر نے کہا ہے کہ بطور فنکار اور بطور انسان ان کی شخصیت کی بنیاد ان کی والدہ ہی نے رکھی۔انہوں نے لکھا ہے کہ ایسا کوئی دن نہیں گزرتا جب مجھے ان کی کوئی نصیحت، کوئی یاد یا ان کی آواز دل میں سنائی نہ دے، ہم انہیں بے حد یاد کرتے ہیں، لیکن اس بات پر ہمیشہ شکر گزار رہیں گے کہ وہ ہماری زندگی کا حصہ رہیں، میری درخواست ہے کہ آپ انہیں اپنی دعاں میں یاد رکھیں اور اسی محبت کے ساتھ یاد کریں جو وہ ہمیشہ دوسروں میں بانٹتی رہیں۔