ایس ای سی پی نے تصدیق انفارمیشن سروسز لمیٹڈ کے آئی پی او کے پراسپیکٹس کے اجراء اور اشاعت کی منظوری دیدی

منگل 21 جولائی 2026 16:29

اسلام آباد (اُردو پوائنٹ اخبارتازہ ترین - این این آئی۔ 21 جولائی2026ء) سیکیورٹیز ایکسچینج کمیشن آف پاکستان (ایس ای سی پی) نے تصدیق انفارمیشن سروسز لمیٹڈ کے آئی پی او کے پراسپیکٹس کے اجرائ اور اشاعت کی منظوری دے دی ہے۔تفصیلات کے مطابق فروری 2026 میں نئی انتظامیہ کے آنے کے بعد سے ایس ای سی پی نے آئی پی او کی منظوریوں میں تیزی لائی ہے، جس کے نتیجے میں اب تک 10 آئی پی اوز مارکیٹ میں آ چکے ہیں،یہ مالی سال 2026-27 کا پہلا منظور شدہ آئی پی او ہے۔

تصدیق انفارمیشن سروسز لمیٹڈ اسٹیٹ بینک آف پاکستان سے لائسنس یافتہ ایک کریڈٹ بیورو ہے، جو انفرادی اور کاروباری قرض داروں کی کریڈٹ معلومات جمع کر کے اپنے رکن اداروں کو فراہم کرتی ہے تاکہ قرض کے فیصلے بہتر انداز میں کیے جا سکیں-کمپنی مجموعی طور پر 21 کروڑ 90 لاکھ عام حصص پیش کر رہی ہے۔

(جاری ہے)

ان میں سے 6 کروڑ 90 لاکھ حصص پری-آئی پی او سرمایہ کاروں کو دیے جائیں گے، جبکہ 15 کروڑ حصص (پوسٹ-آئی پی او سرمائے کا 15.79%) آئی پی او کے ذریعے پیش کیے جائیں گے۔

یہ آئی پی او بک بلڈنگ کے طریقہ کار کے تحت ہو گا، جس میں 75% حصص ادارہ جاتی اور بڑے سرمایہ کاروں کو، اور 25% عام (ریٹیل) سرمایہ کاروں کو ملیں گے۔یہ منظوری ظاہر کرتی ہے کہ ایس ای سی پی کا ریگولیٹری نظام شفافیت اور سرمایہ کاروں کے تحفظ کو یقینی بناتے ہوئے سرمائے کی تشکیل میں مؤثر کردار ادا کر رہا ہے۔ سادہ تقاضوں، تیز منظوریوں اور زیادہ ڈیجیٹلائزیشن جیسی حالیہ اصلاحات نے کمپنیوں کے لیے پبلک لسٹنگ کے ذریعے کیپیٹل مارکیٹ تک رسائی کو آسان بنا دیا ہے۔ایس ای سی پی مارکیٹ شراکت داروں کے ساتھ مل کر ملک بھر میں آئی پی او روڈ شوز کا انعقاد بھی جاری رکھے ہوئے ہے تاکہ کمپنیوں کو عوامی لسٹنگ کے فوائد سے آگاہ کیا جا سکے۔