دھابیجی پمپنگ اسٹیشن پر بجلی کا بریک ڈاؤن، کراچی میں پانی کی فراہمی متاثر ہونے کا خدشہ

کیبل فالٹ کے باعث تین پمپ بند، شہر کو یومیہ 75 ملین گیلن پانی کی فراہمی میں عارضی کمی متوقع، کے الیکٹرک کی تکنیکی ٹیم مرمت میں مصروف

اتوار 26 جولائی 2026 16:40

کراچی(اُردو پوائنٹ اخبارتازہ ترین - این این آئی۔ 26 جولائی2026ء) کراچی واٹر اینڈ سیوریج کارپوریشن نے کہا ہے کہ دھابیجی پمپنگ اسٹیشن پر کے الیکٹرک کی جانب سے بجلی کے بریک ڈاؤن کے باعث شہر کے مختلف علاقوں میں پانی کی فراہمی متاثر ہونے کا خدشہ ہے۔ ترجمان کے مطابق بجلی کی مکمل بحالی تک بعض علاقوں میں پانی کی سپلائی معمول سے کم رہ سکتی ہے۔ترجمان کے مطابق اتوار کی صبح 8 بج کر 45 منٹ پر دھابیجی پمپنگ اسٹیشن کے تھرڈ فیز میں بجلی کا بریک ڈاؤن پیش آیا، جس کے باعث تھرڈ فیز کو بجلی کی فراہمی معطل ہوگئی۔

کے الیکٹرک نے خرابی کو کیبل فالٹ قرار دیتے ہوئے تکنیکی ٹیم کو فوری طور پر موقع پر روانہ کر دیا ہے، جو فالٹ دور کرنے کے لیے کام کر رہی ہے۔ترجمان نے بتایا کہ کیبل فالٹ کے نتیجے میں دھابیجی پمپنگ اسٹیشن کے تین پمپ عارضی طور پر بند ہو گئے ہیں، جس کے باعث شہر کو یومیہ 75 ملین گیلن پانی کی فراہمی میں عارضی کمی کا امکان پیدا ہوگیا ہے۔

(جاری ہے)

واٹر کارپوریشن کے مطابق اس صورتحال سے نارتھ ناظم آباد، ناظم آباد، گلبرگ ٹاؤن، نیو کراچی، لانڈھی، کورنگی اور اسکیم 33 کے بعض علاقوں میں پانی کی فراہمی متاثر ہو سکتی ہے۔

ترجمان نے بتایا کہ کراچی واٹر اینڈ سیوریج کارپوریشن کی انتظامیہ فالٹ کے فوری خاتمے اور بجلی کی بحالی کے لیے کے الیکٹرک کے ساتھ مسلسل رابطے میں ہے۔ بجلی کی مکمل بحالی کے فوراً بعد تمام پمپ دوبارہ آپریشنل کر دیے جائیں گے تاکہ پانی کی فراہمی کو جلد از جلد معمول پر لایا جا سکے۔شہریوں سے اپیل کی گئی ہے کہ پانی کا محتاط استعمال کریں اور عارضی صورتحال کے پیش نظر غیر ضروری استعمال سے گریز کریں، جبکہ متعلقہ ادارے بحالی کے کام کی مسلسل نگرانی کر رہے ہیں۔