روڈ کی جگہ پر چاول کاشت! ترقی کے حکومتی دعوے کیچڑ میں دھنس گئے

پنجاب حکومت نے سڑک نہ بنائی تو عوام نے احتجاجاً کھیت بنالیا، تونسہ کی وائرل ویڈیو نے حکومتی دعوؤں پر سوال اٹھا دیئے

ساجد علی منگل 28 جولائی 2026 13:24

روڈ کی جگہ پر چاول کاشت! ترقی کے حکومتی دعوے کیچڑ میں دھنس گئے

ڈیرہ غازی خان (اُردو پوائنٹ اخبارتازہ ترین۔ 28 جولائی 2026ء) جنوبی پنجاب کے علاقے تونسہ شریف کے نواحی قصبے ٹبی قیصرانی کی ایک ویڈیو سوشل میڈیا پر تیزی سے وائرل ہو رہی ہے، جس میں شہریوں نے خستہ حال سڑک پر حکومت کے خلاف منفرد انداز میں احتجاج کرتے ہوئے سڑک پر ہی چاول کی کاشت شروع کردی، ویڈیو میں دیکھا جا سکتا ہے کہ سڑک اس قدر ٹوٹ پھوٹ اور کیچڑ کا شکار ہے کہ مقامی افراد اسے سڑک کے بجائے دھان کے کھیت میں تبدیل کرنے کی علامتی کوشش کر رہے ہیں۔

تفصیلات کے مطابق سوشل میڈیا پر گردش کرنے والی ویڈیو میں کچھ لوگ سڑک کے درمیان کیچڑ میں کھڑے ہو کر چاول کی پنیری لگاتے دکھائی دے رہے ہیں، جبکہ اردگرد موجود شہری اس منظر کو دیکھ رہے ہیں، سڑک پر پانی اور کیچڑ کی بڑی مقدار کے باعث یہ راستہ کھیت کا منظر پیش کر رہا ہے، جس پر روزانہ مقامی آبادی کو آمدورفت میں شدید مشکلات کا سامنا کرنا پڑتا ہے۔

(جاری ہے)

تونسہ شریف کے نواحی علاقے ٹبی قیصرانی کا یہ روڈ ہے۔اندازہ لگائیں جنوبی پنجاب کی پسماندگی کا۔اس روڈ سے ٹریول کرتے ہیں لوگ۔احتجاجا لوگ اس روڈ پر چاول کی کاشت کر رہے۔کیونکہ روڈ کھیت کی شکل اختیار کر چکا ہے۔انتظامیہ حکمران سب تماشائی ہیں عوام کے دکھ تکلیف میں۔@GovtofPunjabPK… pic.twitter.com/SMVzvvqdW4
— Jan Sher (@realsher07) July 28, 2026

سوشل میڈیا پر وائرل اس ویڈیو کے ساتھ کیے گئے دعوے میں کہا گیا ہے کہ یہ سڑک تونسہ شریف کے نواحی علاقے ٹبی قیصرانی میں واقع ہے، جہاں طویل عرصے سے سڑک کی خستہ حالی برقرار ہے، عوام کی جانب سے متعدد بار توجہ دلانے کے باوجود متعلقہ حکام نے سڑک کی تعمیر و مرمت کے لیے مؤثر اقدامات نہیں کیے، جس کے بعد شہریوں نے احتجاجاً سڑک پر چاول کاشت کرکے اپنی بے بسی دنیا کو دکھانے کی کوشش کی۔