سندھ حکومت کا یومِ آزادی اور یومِ دفاع کے موقع پر صوبے کے تمام ڈویژنوں اور اضلاع میں کھیلوں کی تقریبات، پرچم کشائی اور کیک کٹنگ کے انعقاد کا فیصلہ

کراچی (اُردو پوائنٹ اخبارتازہ ترین - این این آئی۔ 04 اگست2026ء) وزیر کھیل و امورِ نوجوانان سندھ سردار محمد بخش مہر کی زیرِ صدارت یومِ آزادی(14 اگست)اور یومِ دفاع (6 ستمبر)کے موقع پر صوبہ بھر میں اسپورٹس ایونٹس کے انعقاد سے متعلق ایک اہم اجلاس منعقد ہوا۔ اجلاس میں سیکریٹری کھیل منور علی مہیسر اور ڈائریکٹر کھیل اسد اسحاق نے صوبائی وزیر کو ایونٹس کے انتظامات پر تفصیلی بریفنگ دی۔

اجلاس کے دوران وزیر کھیل سندھ نے محکمہ کھیل و امورِ نوجوانان کے تمام ڈسٹرکٹ اسپورٹس آفیسرز اور متعلقہ افسران کو ہدایت کی کہ تمام انتظامات فوری طور پر مکمل کیے جائیں تاکہ یومِ آزادی اور یومِ دفاع کی تقریبات قومی جوش و جذبے اور بھرپور انداز میں منعقد کی جا سکیں۔سردار محمد بخش مہر نے کہا کہ 14 اگست اور 6 ستمبر کے موقع پر صوبہ بھر میں مختلف کھیلوں کے مقابلے منعقد کیے جائیں گے، جبکہ سندھ کے تمام ڈویژنوں اور اضلاع میں پرچم کشائی اور کیک کٹنگ کی تقریبات بھی منعقد ہوں گی۔

(جاری ہے)

انہوں نے کہا کہ کراچی کے تمام اضلاع سمیت پورے صوبے میں کھیلوں کی سرگرمیوں کے ذریعے قومی یکجہتی، حب الوطنی اور آزادی کی اہمیت کو اجاگر کیا جائے گا۔انہوں نے بتایا کہ ضلع ملیر میں سیلف ڈیفنس، فٹبال، کرکٹ، مکسڈ مارشل آرٹس، باکسنگ اور روایتی کھیلوں کے مقابلے منعقد ہوں گے، جبکہ سندھ یوتھ کلب گلستانِ جوہر میں مکسڈ مارشل آرٹس اور جوڈو کے مقابلے کرائے جائیں گے۔

ضلع سینٹرل کراچی میں بیڈمنٹن، جمناسٹکس اور رولر اسکیٹنگ ایونٹس کا انعقاد ہوگا۔وزیر کھیل سندھ کے مطابق بدین، ٹنڈوالہ یار، دادو، مٹیاری، ٹنڈو محمد خان، قمبر شہدادکوٹ، تھرپارکر، شکارپور اور جیکب آباد میں بھی مختلف اسپورٹس ایونٹس منعقد کیے جائیں گے۔ حیدرآباد میں جشنِ آزادی اسپورٹس گالا فیسٹیول کے تحت آٹھ مختلف کھیلوں کے مقابلے ہوں گے، جبکہ لاڑکانہ میں بیڈمنٹن، فٹبال، باسکٹ بال، ٹیبل ٹینس اور والی بال کے مقابلے منعقد کیے جائیں گی. انہوں نے کہا کہ ٹھٹہ میں انٹر اسکول گرلز آزادی اسپورٹس فیسٹیول کے تحت تھروبال، بیڈمنٹن، ٹیبل ٹینس اور ٹگ آف وار کے مقابلے ہوں گے، جبکہ میرپورخاص میں 6 سے 14 اگست تک انٹر اسکول گرلز و بوائز باسکٹ بال، کوڈی کوڈی، ہاکی سمیت مختلف کھیلوں کے مقابلے منعقد کیے جائیں گے۔

سردار محمد بخش مہر نے مزید بتایا کہ گھوٹکی میں 14 اگست کو منی میراتھن اور سندھ و پنجاب کی ٹیموں کے درمیان کوڈی کوڈی کا مقابلہ ہوگا، جبکہ شہید بینظیرآباد میں اسپورٹس فیسٹیول کے تحت شوٹنگ بال، فٹبال، کرکٹ، ہاکی، ونجھ وٹی اور رنگ بال کے مقابلے منعقد کیے جائیں گے۔ سکھر میں آل سندھ فٹسال چیمپئن شپ، تائیکوانڈو، سائیکل ریس اور باسکٹ بال ایونٹس جبکہ سانگھڑ میں یومِ آزادی اسپورٹس فیسٹیول کے تحت مختلف کھیلوں کا انعقاد کیا جائے گا۔

وزیر کھیل سندھ نے کہا کہ کھیلوں کے ذریعے نوجوانوں میں حب الوطنی، قومی یکجہتی اور مثبت سوچ کو فروغ دیا جائے گا۔ صحت مند سرگرمیوں اور مثبت مقابلے کے رجحان کو فروغ دینے کے لیے مختلف کھیلوں کا انعقاد کیا جا رہا ہے۔ انہوں نے کہا کہ نمایاں کارکردگی دکھانے والے کھلاڑیوں اور ٹیموں کی حوصلہ افزائی کی جائے گی، صوبہ بھر کے نوجوانوں کو کھیلوں کی سرگرمیوں میں بھرپور شرکت کے مواقع فراہم کیے جائیں گیاور سندھ حکومت نوجوانوں میں کھیلوں کے فروغ کے لیے عملی اقدامات جاری رکھے ہوئے ہے۔