نیوٹیک کے چیئرمین انجینئر قمر الاسلام راجہ سے یورپی یونین کے وفد کے سربراہ برائے ترقیاتی تعاون جیروم ولہیم کی ملاقات

جمعرات 6 اگست 2026 16:56

اسلام آباد (اُردو پوائنٹ اخبارتازہ ترین - اے پی پی۔ 06 اگست2026ء) یورپی یونین کے وفد کے سربراہ برائے ترقیاتی تعاون جیروم ولہیم نے جمعرات کو نیشنل ووکیشنل اینڈ ٹیکنیکل ٹریننگ کمیشن (نیوٹیک) کے چیئرمین انجینئر قمر الاسلام راجہ سے نیوٹیک ہیڈکوارٹر میں ملاقات کی جس میں تکنیکی و پیشہ ورانہ تعلیم و تربیت (ٹی وی ای ٹی) کے شعبے میں باہمی تعاون کو مزید فروغ دینے اور مستقبل میں مشترکہ منصوبوں کے امکانات پر تبادلہ خیال کیا گیا۔

ملاقات کے دوران فریقین نے پاکستان میں ہنرمندی کے فروغ، افرادی قوت کی استعداد بڑھانے اور عالمی معیار کی تکنیکی و پیشہ ورانہ تربیت کے فروغ کے لیے جاری تعاون کا جائزہ لیا۔ اس موقع پر ٹی وی ای ٹی کے شعبے میں نئی شراکت داریوں اور مشترکہ اقدامات کے ذریعے نوجوانوں کے لیے بہتر روزگار کے مواقع پیدا کرنے کی ضرورت پر بھی زور دیا گیا۔

(جاری ہے)

چیئرمین نیوٹیک انجینئر قمر الاسلام راجہ نے یورپی یونین کی جانب سے پاکستان میں ہنر مندی کے شعبے کی ترقی کے لیے تعاون کو سراہتے ہوئے کہا کہ نیوٹیک عالمی شراکت داروں کے ساتھ مل کر نوجوانوں کو جدید تقاضوں سے ہم آہنگ مہارتیں فراہم کرنے کے لیے پرعزم ہے۔

یورپی یونین کے وفد کے سربراہ برائے ترقیاتی تعاون جیروم ولہیم نے بھی ٹی وی ای ٹی کے شعبے میں تعاون کو مزید وسعت دینے میں دلچسپی کا اظہار کیا اور مستقبل میں مشترکہ منصوبوں کے ذریعے پاکستان میں مہارتوں کے فروغ کے لیے تعاون جاری رکھنے کے عزم کا اعادہ کیا۔