سوات یونیورسٹی کا مالی سال 2026-27ء کیلئے ایک ارب 21کروڑ روپے سے زائد کا بجٹ منظور

جمعرات 6 اگست 2026 20:05

سوات (اُردو پوائنٹ اخبارتازہ ترین - این این آئی۔ 06 اگست2026ء) سوات یونیورسٹی کی سینیٹ نے مالی سال 2026-27ء کیلئے ایک ارب 21 کروڑ 70 لاکھ روپے سے زائد کے بجٹ کی منظوری دے دی، جبکہ گزشتہ دو مالی سالوں کے اخراجات کی بھی توثیق کر دی۔صوبائی وزیر برائے اعلی تعلیم مینا خان کی زیر صدارت اجلاس میں مالیاتی و انتظامی امور کا جائزہ لیا گیا۔

(جاری ہے)

سینیٹ نے اساتذہ کے ایم فل اور پی ایچ ڈی سپروائزرز کے معاوضے، 7 فیصد ایڈہاک ریلیف الائونس، سابق الائونسز کو بنیادی تنخواہ میں ضم کرنے، کنوینس الانس میں 50فیصد اضافے اور پنشن میں 7فیصد اضافے کی منظوری بھی دی، جبکہ ڈسپیریٹی ریڈکشن الانس کو متعلقہ حکومتی فیصلوں سے مشروط قرار دیا گیا۔

اجلاس سے خطاب کرتے ہوئے صوبائی وزیر مینا خان نے جامعہ سوات کی مالیاتی نظم و نسق اور تعلیمی معیار کو سراہا، جبکہ وائس چانسلر پروفیسر ڈاکٹر محمد قاسم نے ان فیصلوں کو جامعہ کے استحکام اور تعلیمی ترقی کیلئے اہم قرار دیا۔