آزاد کشمیرالیکشن تیسرا مرحلہ،ضلع پونچھ اور پلندری میں انتخابات موخر

ضلع باغ کے تین انتخابی حلقوں اور ضلع حویلی کے ایک حلقہ میں حسب سابق پولنگ 10 اگست کو ہوگی، ترجمان الیکشن کمیشن

جمعہ 7 اگست 2026 14:35

مظفرآباد (اُردو پوائنٹ اخبارتازہ ترین - این این آئی۔ 07 اگست2026ء) آزاد جموں کشمیرمیں جاری عام انتخابات کے تیسرے مرحلہ میں ضلع پونچھ اور ضلع پلندری میں امن و امان کی صورتحال کے پیش نظر انتخابات موخرکردئیے گئے ہیں۔ترجمان الیکشن کمیشن کے مطابق ضلع پونچھ اور ضلع پلندری کے انتخابی حلقوں میں 10اگست کو پولنگ منعقد نہیں ہوگی، ضلع باغ کے تین انتخابی حلقوں اور ضلع حویلی کے ایک حلقہ میں حسب سابق پولنگ 10اگست کو ہوگی۔

الیکشن کمیشن کے مطابق انتخابات موخر کرنے کا فیصلہ امن و امان کی صورتحال کے حوالے سے تحفظات اور بعض سیاسی شخصیات اور امیدواروں کی جانب سے الیکشن کمیشن کو دی گئی درخواستوں کے پیش نظر کیا گیا۔انتخابات کی نئی تاریخ اور نظر ثانی شدہ شیڈول کا اعلان حالات کا جائزہ لینے اور تمام متعلقہ امور کو مدنظر رکھتے ہوئے بعد ازاں کیا جائے گا۔

(جاری ہے)

انتخابات ملتوی کرنے کا فیصلہ امن و امان کی صورتحال کے تناظر میں کیا گیا تاکہ انتخابات کا انعقاد آزادانہ ، منصفانہ شفاف اور پرامن ماحول میں یقینی بنایا جاسکے۔

قبل ازیں الیکشن کمیشن آزاد جموں و کشمیر ںے 10 اگست کو ہونے والے انتخابات کے تیسرے مرحلے میں پونچھ ڈویژن میں پولنگ ملتوی ہونے سے متعلق گردش کرنے والی خبروں کو بے بنیاد اور خلافِ حقائق قرار دیا تھا۔ترجمان الیکشن کمیشن نے ایک بیان میں واضح کیا ہے کہ پونچھ ڈویژن کے تمام حلقہ جات میں پولنگ 10 اگست کو الیکشن کمیشن کے جاری کردہ شیڈول کے مطابق ہوگی۔

انہوں نے الیکشن ملتوی ہونے کی خبروں کو بے بنیاد اور حقائق کے منافی قرار دیتے ہوئے ووٹرز سے اپیل کی ہے کہ وہ افواہوں پر کان نہ دھریں اور 10 اگست کو مقررہ شیڈول کے مطابق اپنا حقِ رائے دہی استعمال کریں۔ان کا کہنا تھا کہ پولنگ شیڈول میں کسی بھی تبدیلی کی صورت میں الیکشن کمیشن کی جانب سے بروقت آگاہ کیا جائیگا۔واضح رہے کہ سوشل میڈیا پر متعدد صارفین بشمول آزاد کشمیر کے چند صحافیوں کی جانب سے پونچھ اور سدھنوتی اضلاع کے کچھ حلقوں میں الیکشن ملتوی ہونے کی خبریں شیئر کی گئیں تھیں۔

ان حلقوں میں کالعدم ایکشن کمیٹی کی جانب سے لگ بھگ دو ماہ سے جاری احتجاج اور قانون نافذ کرنے والے اداروں کیساتھ تصادم کی وجہ سے الیکشن کا عمل پہلے ہی غیر یقینیت کا شکار تھا، جس میں سوشل میڈیا پر چلنے والی افواہوں کی وجہ سے اضافہ ہوا۔انتخابات کے پہلے دو مرحلوں میں آزاد جموں و کشمیر کی دو ڈویژنز میں الیکشن کا عمل کامیابی سے مکمل ہو چکا ہے جس میں مسلم لیگ ن نے واضح برتری حاصل کی ہے جبکہ پیپلز پارٹی نے دھاندلی کے الزامات لگاتے ہوئے میرپور ڈویژن کے 4 حلقوں کے نتائج پر تحقیقات کا مطالبہ کر رکھا ہے۔