کراچی میں پانی اور سیوریج کے بلوں میں 7.05 فیصد اضافہ، گھریلو صارفین پر ماہانہ 100 روپے تک اضافی بوجھ

جمعہ 14 اگست 2026 15:51

کراچی (اُردو پوائنٹ اخبارتازہ ترین - این این آئی۔ 14 اگست2026ء) کراچی واٹر اینڈ سیوریج کارپوریشن نے رواں مالی سال 2026-27 کے لیے پانی اور سیوریج کے ٹیرف میں 7.05 فیصد اضافہ کردیا، جس کے بعد گھریلو اور کمرشل صارفین کے اوسط ماہانہ بل میں تقریباً 100 روپے تک اضافہ ہوگا۔کراچی واٹر اینڈ سیوریج کارپوریشن کے مطابق مالی سال 2025-26 کے دوران گھریلو اور کمرشل صارفین کا اوسط ماہانہ بل تقریباً 900 روپے تھا، جو ٹیرف میں حالیہ اضافے کے بعد رواں مالی سال میں بڑھ کر تقریباً ایک ہزار روپے ماہانہ ہوجائے گا۔

اس طرح اوسط صارف پر ماہانہ تقریباً 100 روپے کا اضافی بوجھ پڑے گا۔واٹر کارپوریشن کے مطابق ٹیرف میں 7.05 فیصد اضافہ سالانہ صارف اشاریہ قیمت کی بنیاد پر کیا گیا ہے، جس کا اطلاق کراچی کے تقریباً 12 لاکھ 89 ہزار گھریلو اور کمرشل صارفین پر ہوگا، جبکہ تقریباً 8 ہزار بلک اور صنعتی صارفین بھی نئی شرحوں سے متاثر ہوں گے۔

(جاری ہے)

حکام کے مطابق حجمی بنیاد پر بل وصول کرنے والے بلک اور صنعتی صارفین کے لیے پانی کا ٹیرف بھی 0.526 پیسہ فی گیلن سے بڑھا کر 0.563 پیسہ فی گیلن کردیا گیا ہے۔

چیف کمرشل آفیسر کراچی واٹر اینڈ سیوریج کارپوریشن حارث سرفراز کے مطابق ٹیرف میں اضافہ ادارے کو درپیش بڑھتے ہوئے آپریشنل اخراجات کے پیش نظر کیا گیا ہے۔ ان کا کہنا تھا کہ بجلی، ایندھن، مرمت و دیکھ بھال اور پرانے بنیادی ڈھانچے کی بحالی سمیت مختلف شعبوں کے اخراجات میں مسلسل اضافہ ہورہا ہے، جس کے باعث موجودہ ٹیرف میں سالانہ ایڈجسٹمنٹ ضروری تھی۔

انہوں نے کہا کہ ٹیرف میں اضافے سے حاصل ہونے والی اضافی آمدنی کراچی میں پانی اور سیوریج کے بنیادی ڈھانچے کی بہتری پر خرچ کی جائے گی۔ اس رقم سے پانی کی ترسیل اور تقسیم کے نیٹ ورک کی بحالی، اہم تنصیبات کی مرمت و دیکھ بھال، سیوریج نظام کی اپ گریڈیشن اور شہریوں کو فراہم کی جانے والی خدمات میں بہتری لانے کے اقدامات کیے جائیں گے۔واٹر کارپوریشن حکام نے کہا کہ نئی ٹیرف ایڈجسٹمنٹ کا مقصد ادارے کے آپریشنل اخراجات پورے کرنے کے ساتھ ساتھ مالی استحکام اور پانی و سیوریج کی خدمات کو طویل مدت تک بہتر انداز میں جاری رکھنا ہے۔