صدر لاہور چیمبر کی مؤثر کاوش، سگیاں انڈسٹریل ایریا کی سیل فیکٹری بحال

لاہور (اُردو پوائنٹ اخبارتازہ ترین - این این آئی۔ 18 اگست2026ء) لاہور چیمبر آف کامرس اینڈ انڈسٹری کے صدر فہیم الرحمن سہگل نے سگیاں انڈسٹریل ایریا کا دورہ کیا اور صنعتکاروں سے ملاقات کے دوران صنعتی مسائل اور کاروباری سرگرمیوں میں حائل رکاوٹوں پر تبادلہ خیال کیا۔ اس موقع پر صنعتکاروں نے بالخصوص روڈا کے تحت سیل کی گئی فیکٹری کو دوبارہ کھلوانے کے لیے صدر لاہور چیمبر کی مؤثر اور مسلسل کاوشوں کو سراہتے ہوئے ان کا خصوصی شکریہ ادا کیا۔

اس موقع پر صدر سگیاں انڈسٹریز محمد امین، علی شیراز، مقصود، منظور، اسلام، عاطف، ناصر اور عامر سمیت دیگر صنعتکار موجود تھے۔ ایگزیکٹو کمیٹی ممبر رانا شعبان اختر، رمیز دیوان سمیت لاہور چیمبر کے دیگر عہدیداران اور ممبران نے بھی شرکت کی۔

(جاری ہے)

صنعتکاروں نے کہا کہ فیکٹری کی سیلنگ سے نہ صرف صنعتی سرگرمیاں متاثر ہو رہی تھیں بلکہ کاروبار، روزگار اور وابستہ افراد کا معاشی مستقبل بھی متاثر ہونے کا خدشہ تھا۔

ایسے حالات میں صدر لاہور چیمبر فہیم الرحمن سہگل نے معاملے کا فوری نوٹس لیا اور صنعتکاروں کے مسئلے کو متعلقہ حکام کے سامنے مؤثر انداز میں اٹھایا۔انہوں نے کہا کہ صدر لاہور چیمبر نے روڈا کے تحت سیل کی گئی فیکٹری کو دوبارہ کھلوانے کے لیے متعلقہ اداروں کے ساتھ مؤثر رابطہ کیا اور صنعتکاروں کے مؤقف کی بھرپور نمائندگی کی، جس کے نتیجے میں فیکٹری کو دوبارہ کھولنے میں کامیابی حاصل ہوئی۔

صنعتکاروں نے اس اقدام کو کاروباری برادری کے لیے ایک اہم ریلیف قرار دیتے ہوئے کہا کہ اس سے نہ صرف صنعتی سرگرمیاں بحال ہوئیں بلکہ فیکٹری سے وابستہ روزگار بھی محفوظ ہوا۔اس موقع پر صدر لاہور چیمبر فہیم الرحمن سہگل نے کہا کہ صنعتوں کو بلاوجہ بند یا سیل کرنے کے بجائے مسائل کا حل بات چیت اور باہمی مشاورت کے ذریعے نکالا جانا چاہیے۔ انہوں نے کہا کہ کسی بھی صنعتی یونٹ کی بندش سے صرف ایک کاروبار متاثر نہیں ہوتا بلکہ اس سے مزدوروں، ملازمین، سپلائرز اور دیگر متعلقہ افراد کا روزگار بھی متاثر ہوتا ہے۔

انہوں نے کہا کہ لاہور چیمبر صنعتکاروں کے جائز مسائل کے حل کے لیے متعلقہ اداروں کے ساتھ مسلسل رابطے میں ہے اور جہاں کہیں کاروباری سرگرمیوں میں غیر ضروری رکاوٹیں پیدا ہوں گی، وہاں کاروباری برادری کی آواز مؤثر انداز میں اٹھائی جائے گی۔ ان کا کہنا تھا کہ صنعتوں کو سہولت دینا اور کاروباری ماحول کو سازگار بنانا ملکی معیشت، روزگار اور سرمایہ کاری کے فروغ کے لیے ناگزیر ہے۔

فہیم الرحمن سہگل نے کہا کہ لاہور چیمبر کی کوشش ہے کہ صنعتکاروں کو درپیش مسائل کو صرف اجاگر ہی نہ کیا جائے بلکہ ان کے عملی حل کے لیے بھی مؤثر اقدامات کیے جائیں۔ انہوں نے کہا کہ سگیاں انڈسٹریل ایریا سمیت لاہور کے دیگر صنعتی علاقوں میں کاروباری برادری کو درپیش مسائل کے حل کے لیے بھی متعلقہ حکام سے رابطہ کیا جائے گا۔صنعتکاروں نے صدر لاہور چیمبر کی جانب سے فیکٹری کی ڈی سیلنگ کے لیے کی جانے والی کوششوں کو سراہتے ہوئے کہا کہ اس اقدام سے انہیں یہ اعتماد ملا ہے کہ لاہور چیمبر مشکل حالات میں صنعتکاروں کے ساتھ کھڑا ہے۔

انہوں نے امید ظاہر کی کہ آئندہ بھی صنعتی یونٹس کو درپیش مسائل کے حل کے لیے لاہور چیمبر اسی مؤثر انداز میں اپنا کردار ادا کرتا رہے گا۔صنعتکاروں نے فہیم الرحمن سہگل کی کاوشوں کو سراہتے ہوئے کہا کہ فیکٹری کی دوبارہ بحالی اس امر کی مثال ہے کہ لاہور چیمبر کاروباری برادری کے مسائل کو متعلقہ اداروں کے ساتھ مؤثر انداز میں اٹھا کر عملی ریلیف دلانے کے لیے اپنا کردار ادا کر رہا ہے۔