شرجیل میمن کے خلاف سوشل میڈیا مہم، این سی سی آئی اے کو درخواست گزار کیخلاف کارروائی سے روک دیا گیا

سندھ ہائیکورٹ کی بلال وارثی کو انکوائری افسر کے سامنے پیش ہونے اور تحقیقات میں تعاون کی ہدایت، فریقین کو 6 ستمبر کے نوٹس جاری

بدھ 19 اگست 2026 20:40

کراچی(اُردو پوائنٹ اخبارتازہ ترین - این این آئی۔ 19 اگست2026ء) میر رضا کیس میں صوبائی وزیر شرجیل میمن کے خلاف سوشل میڈیا مہم کے معاملے پر سندھ ہائیکورٹ نے این سی سی آئی اے کو درخواست گزار بلال وارثی کے خلاف مشروط طور پر کارروائی سے روک دیا۔سندھ ہائیکورٹ کے آئینی بینچ نے این سی سی آئی اے کے طلبی نوٹس کے خلاف دائر درخواست پر تحریری حکم نامہ جاری کردیا۔

عدالت نے بلال وارثی کو انکوائری افسر کے سامنے پیش ہونے اور تحقیقات میں تعاون کرنے کی ہدایت بھی کی۔عدالت نے ایڈیشنل اٹارنی جنرل، ڈی جی این سی سی آئی اے، انکوائری افسر سمیت دیگر فریقین کو 6 ستمبر کے لیے نوٹس جاری کرتے ہوئے جواب طلب کرلیا۔درخواست گزار کے وکیل طاہر اقبال ایڈووکیٹ نے مؤقف اختیار کیا کہ این سی سی آئی اے نے 10 اگست کو بلال وارثی کو طلبی کا نوٹس جاری کیا تھا، جبکہ انہیں 13 اگست کو اصل شناختی کارڈ کے ہمراہ پیش ہونے کی ہدایت کی گئی تھی۔

(جاری ہے)

وکیل نے عدالت کو بتایا کہ شرجیل میمن کے خلاف پوسٹس جس سوشل میڈیا اکاؤنٹ سے کی گئی ہیں، درخواست گزار کا اس اکاؤنٹ سے کوئی تعلق نہیں ہے۔ انہوں نے بلال وارثی اور ان کے اہل خانہ کو ہراساں کیے جانے سے روکنے کی استدعا بھی کی۔عدالت نے فریقین سے جواب طلب کرتے ہوئے کیس کی مزید سماعت 6 ستمبر تک ملتوی کردی۔