Live Updates

ڈیزل سستا ہونے کے باوجود زائد کرایہ وصول کرنے کا نوٹس، ٹرانسپورٹرز کے خلاف کارروائی کی ہدایت

جمعرات 20 اگست 2026 17:09

کراچی(اُردو پوائنٹ اخبارتازہ ترین - این این آئی۔ 20 اگست2026ء) سندھ کے سینئر وزیر شرجیل انعام میمن نے ڈیزل کی قیمتوں میں کمی کے باوجود مسافروں سے زائد کرایہ وصول کرنے کی شکایات کا نوٹس لیتے ہوئے محکمہ ٹرانسپورٹ کے حکام کو کرایوں میں کمی پر سختی سے عملدرآمد یقینی بنانے کی ہدایت کردی۔شرجیل انعام میمن نے سیکریٹری ٹرانسپورٹ اور دیگر متعلقہ حکام کو ہدایت کی کہ ڈیزل کی قیمتوں میں کمی کے بعد عوام کو کرایوں میں کمی کا فائدہ پہنچایا جائے اور مسافروں سے زائد کرایہ وصول کرنے والے ٹرانسپورٹرز کے خلاف قانون کے مطابق کارروائی کی جائے۔

سندھ کے سینئر وزیر نے کہا کہ عوام کو ریلیف فراہم کرنا حکومت کی ذمہ داری ہے اور کسی بھی ٹرانسپورٹر کو مسافروں سے من مانا یا مقررہ کرائے سے زائد وصول کرنے کی اجازت نہیں دی جاسکتی۔

(جاری ہے)

انہوں نے متعلقہ افسران کو ہدایت کی کہ مختلف روٹس پر کرایوں کی نگرانی کا عمل مزید مؤثر بنایا جائے اور زائد کرایہ وصول کرنے کی شکایت سامنے آنے پر فوری کارروائی عمل میں لائی جائے۔

شرجیل انعام میمن نے کہا کہ ڈیزل کی قیمتوں میں کمی کے باوجود مسافروں سے زائد کرایہ وصول کرنا کسی صورت قابل قبول نہیں۔ ٹرانسپورٹرز کو حکومت کی جانب سے مقرر کردہ کرایوں پر عملدرآمد کرنا ہوگا۔انہوں نے واضح کیا کہ کرایوں میں کمی کے فیصلے کی خلاف ورزی کرنے والے ٹرانسپورٹرز کے خلاف قانون کے مطابق کارروائی کی جائے گی۔صوبائی وزیر نے کہا کہ سندھ حکومت عوام کو ہر ممکن ریلیف فراہم کرنے کے لیے اقدامات کررہی ہے اور مسافروں کے حقوق کا تحفظ یقینی بنانے کے لیے متعلقہ محکموں کو مؤثر نگرانی کی ہدایات جاری کردی گئی ہیں۔