حیدرآباد ڈسٹرکٹ بار کے انتخابات، شاکر نواز صدر اور عبدالرزاق درس جنرل سیکرٹری منتخب

جمعہ 21 اگست 2026 22:49

حیدرآباد (اُردو پوائنٹ اخبارتازہ ترین - این این آئی۔ 21 اگست2026ء) : حیدرآباد ڈسٹرکٹ بار ایسوسی ایشن کے سالانہ انتخابات میں کانٹے دار مقابلے کے بعد شاکر نواز شر صدر اور عبدالرزاق درس جنرل سیکرٹری منتخب ہوگئے۔ الیکشن کمیٹی نے نتائج غیر حتمی قرار دیتے ہوئے جاری کیے ہیں، جبکہ صدارتی امیدوار عبدالمالک شیخ اور جنرل سیکرٹری کے امیدوار نوید جروار نے دوبارہ گنتی کے لیے درخواستیں جمع کرادی ہیں۔

حیدرآباد ڈسٹرکٹ کورٹس میں پولنگ کے موقع پر وکلا میں زبردست گہما گہمی رہی۔ مجموعی طور پر 13 نشستوں کے لیے 22 امیدواروں کے درمیان مقابلہ ہوا، جبکہ پولنگ کے لیے 7 بوتھ قائم کیے گئے تھے۔ اہل ووٹرز کی تعداد 2390 تھی۔صدارتی نشست پر شاکر نواز شر نے 681 ووٹ حاصل کرکے کامیابی حاصل کی، جبکہ عبدالمالک شیخ 674 ووٹ لے کر دوسرے اور شاہزیب عباسی 259 ووٹ لے کر تیسرے نمبر پر رہے۔

(جاری ہے)

نائب صدر کی نشست پر محمد عامر قریشی 611 ووٹ لے کر کامیاب قرار پائے، ان کے مدمقابل غلام مرتضیٰ لغاری نے 344 ووٹ حاصل کیے۔جنرل سیکرٹری کی نشست پر عبدالرزاق درس نے 582 ووٹ حاصل کرکے کامیابی حاصل کی، جبکہ نوید جروار 575 ووٹ لے کر دوسرے نمبر پر رہے۔جوائنٹ سیکرٹری کی نشست پر فراز کاندھرو 643 ووٹ لے کر کامیاب ہوئے، جبکہ ان کے حریف شاہد لطیف سومرو نے 368 ووٹ حاصل کیے۔

لائبریری سیکرٹری کی نشست پر عابد حسین چانگ نے ریکارڈ 951 ووٹ حاصل کرکے کامیابی حاصل کی، جبکہ نعیم نوناری 446 ووٹ لے سکے۔خازن کی نشست پر پردیپ کمار سونی 498 ووٹ لے کر کامیاب قرار پائے۔مینیجنگ کمیٹی کی 7 نشستوں پر اظفر بلال، غلام سرور، مہوش قریشی، محسن علی، نازش انور، سجاد احمد اور تیمور آرائیں کامیاب قرار پائے۔الیکشن کمیٹی کے مطابق صدارتی امیدوار عبدالمالک شیخ اور جنرل سیکرٹری کے امیدوار نوید جروار کی جانب سے دوبارہ گنتی کی درخواستیں موصول ہوئی ہیں۔

سندھ بار کونسل کے دفتر میں ہفتے کے روز دوبارہ گنتی کے بعد صدر اور جنرل سیکرٹری کی نشستوں کے امیدواروں کی کامیابی کا حتمی اعلان کیا جائے گا۔نتائج کے اعلان کے بعد کامیاب امیدواروں کے حامیوں نے زبردست نعرے بازی کی اور جشن منایا، جبکہ وکلا نے نومنتخب عہدیداروں کو مبارکباد پیش کی۔