جناح انسٹی ٹیوٹ آف کارڈیالوجی گیم چینجر ثابت ہو گا‘خواجہ سلمان رفیق

ہسپتال میں آنے والے مریضوں کو انشاء اللہ بین الاقوامی سطح کی طبی سہولیات فراہم کی جائیں گی‘وزیر صحت

ہفتہ 22 اگست 2026 15:58

جناح انسٹی ٹیوٹ آف کارڈیالوجی گیم چینجر ثابت ہو گا‘خواجہ سلمان رفیق

لاہور (اُردو پوائنٹ اخبارتازہ ترین - این این آئی۔ 22 اگست2026ء) صوبائی وزیر صحت خواجہ سلمان رفیق نے جناح انسٹی ٹیوٹ آف کارڈیالوجی کا دودرہ کیا اور اہم اجلاس کی صدارت کی۔اجلاس میں ڈین پروفیسر ڈاکٹر حسنات خان، ایگزیکٹو ڈائریکٹر پنجاب انسٹی ٹیوٹ آف کارڈیالوجی پروفیسر سید عمران الحسن شاہ، پرنسپل علامہ اقبال میڈیکل کالج پروفیسر ڈاکٹر طیبہ وسیم، ایم ایس جے آئی سی کرنل ریٹائرڈ سبرینا جمیل، ایم ایس پی آئی سی ڈاکٹر عامر رفیق بٹ و دیگر افسران موجود تھے -صوبائی وزیر خواجہ سلمان رفیق نے ہسپتال کے انتظامی امور کا تفصیلی جائزہ لیا ۔

صوبائی وزیر صحت خواجہ سلمان رفیق نے اظہار خیال کرتے ہوئے کہاکہ جناح انسٹی ٹیوٹ آف کارڈیالوجی انشاء اللہ گیم چینجر ثابت ہو گا۔

(جاری ہے)

وزیر اعلیٰ پنجاب مریم نواز کے ویژن کے مطابق اس ہسپتال میں آنے والے مریضوں کو انشاء اللہ بین الاقوامی سطح کی طبی سہولیات فراہم کی جائیں گی۔جناح انسٹی ٹیوٹ آف کارڈیالوجی 16 ارب روپے کی لاگت سے 250 بیڈز پر مشتمل بین الاقوامی طرز پر بننے والا پہلا ہسپتال ہے۔

کیتھ لیب، ایم آر آئی، ماڈیولر آپریشن تھیٹرز اور کارڈیک وارڈز، پیتھالوجی لیب، ریڈیالوجی، آئی سی یو اور ایمرجنسی وارڈ فنکشنل ہارٹ ٹرانسپلانٹ سنٹر،انجیو سوئٹ،ڈائیگناسٹک روم، او پی ڈی اور دیگر شعبوں کا دور، ماڈیولر آپریشن تھیٹرمیں جدید ترین ہارٹ لنگز مشین، ٹیسلا ایم آر آئی و دیگرجدید طبی مشینری باعث مسرت ہے۔ڈاکٹرز اور نرسز محب الوطن پاکستانی بن کر مریضوں کی خدمت کریں گے،دل کے مریضوں کیلئے جناح انسٹی ٹیوٹ آف کارڈیالوجی میں جدید ترین مشین پر الحمدللہ پہلی انجیو گرافی بھی ہو چکی ہے۔ہسپتال میں ڈاکٹرز و سٹاف ہر ڈیوٹی کو اللہ تعالیٰ کی امانت سمجھ کر سرانجام دیں۔