نیپال میں سیلاب سے ہلاکتوں کی تعداد 469 ہوگئی، سینکڑوں افراد تاحال لاپتا

جمعہ 28 اگست 2026 09:12

کھٹمنڈو (اُردو پوائنٹ اخبارتازہ ترین - اے پی پی۔ 28 اگست2026ء) نیپال میں بدھ کے روز آنے والے تباہ کن سیلاب کے نتیجے میں ہلاکتوں کی تعداد 469 ہوگئی ہے۔ جبکہ بڑے پیمانے پر آنے والے سیلاب اور لینڈ سلائیڈنگ کے بعد سیکڑوں افراد تاحال لاپتا ہیں۔ شنہوا کے مطابق نیپال پولیس نے بتایا کہ امدادی اور تلاش کی کارروائیوں کے دوران جمعہ کی صبح تک 469 افراد کی لاشیں نکالی جاچکی ہیں، جبکہ متاثرہ علاقوں میں سرچ اینڈ ریسکیو آپریشن جاری ہے۔

پولیس نے بتایا کہ اب تک1,545 افراد کو بحفاظت ریسکیو کیا جاچکا ہے۔ نیپال کی وزارتِ خارجہ نے کہا ہے کہ ملک کو فی الحال امدادی اور ریسکیو کارروائیوں کے لیے دیگر ممالک کی مدد درکار نہیں۔ وزارت نے کہا کہ قدرتی آفت کے پیش نظر مختلف ممالک کی جانب سے امداد کی پیشکش ایک فطری ردعمل ہے۔

(جاری ہے)

وزارتِ خارجہ کے ترجمان کے مطابق متاثرہ علاقوں میں سرچ اینڈ ریسکیو آپریشنز کی قیادت نیپال کے سیکیورٹی ادارے کر رہے ہیں۔

امدادی ٹیمیں لاپتا افراد کی تلاش اور سیلاب و لینڈ سلائیڈنگ سے ہونے والے نقصانات کا جائزہ لینے میں مصروف ہیں۔ یہ تباہی اتوار کو نیپال کے سرحدی علاقے میں شدید سیلاب کے باعث پیش آئی، جبکہ تبت میں بھی لینڈ سلائیڈنگ کے واقعات رپورٹ ہوئے۔ ان واقعات کے نتیجے میں نیپال اور پڑوسی چینی علاقے میں مجموعی طور پر تقریباً 1400 افراد لاپتا ہوئے تھے۔

حکام نے بعد ازاں لاپتا قرار دیے گئے متعدد افراد کا سراغ لگا لیا یا ان کے بارے میں معلومات حاصل کرلیں، تاہم نیپال اور تبت میں تقریباً 900 افراد اب بھی لاپتا ہیں۔ سیلاب کے باعث متاثرہ علاقوں میں بڑے پیمانے پر تباہی ہوئی ہے، آمدورفت متاثر ہوئی جبکہ بنیادی ڈھانچے کو بھی نقصان پہنچا ہے۔ امدادی ٹیمیں دور دراز اور منقطع علاقوں تک پہنچنے، زندہ بچ جانے والوں کو تلاش کرنے اور متاثرہ افراد کو امداد فراہم کرنے پر توجہ مرکوز کیے ہوئے ہیں۔

نیپالی حکام صورتحال کی مسلسل نگرانی کر رہے ہیں جبکہ ریسکیو آپریشن جاری ہے۔ حکام نے حساس اور خطرے سے دوچار علاقوں میں رہنے والے افراد کو بھی محتاط رہنے کی ہدایت کی ہے، کیونکہ امدادی ادارے مزید سیلاب اور لینڈ سلائیڈنگ کے ممکنہ خطرات کا جائزہ لے رہے ہیں۔