بزرگ شہری معاشرے کا قیمتی سرمایہ، ان کی خدمت ہم سب کی مشترکہ ذمہ داری ہے ،ڈاکٹر فردوس عاشق اعوان

جمعہ 28 اگست 2026 16:13

سیالکوٹ (اُردو پوائنٹ اخبارتازہ ترین - اے پی پی۔ 28 اگست2026ء) سابق وفاقی وزیر ڈاکٹر فردوس عاشق اعوان نے کہا ہے کہ بزرگ شہری ہمارے معاشرے کا قیمتی سرمایہ ہیں جنہوں نے اپنی زندگیاں خاندان، معاشرے اور ملک کی تعمیر و ترقی کے لیے وقف کیں ، ان کی عزت، دیکھ بھال اور خدمت ہم سب کی مشترکہ ذمہ داری ہے۔ ان خیالات کا اظہار انہوں نے شیڈ ٹرسٹ کے زیر اہتمام اولڈ ایج ہوم مسکن میں منعقدہ تقریب سے خطاب کرتے ہوئے کیا ۔

انہوں نے کہا کہ اولڈ ایج ہوم مسکن میں بزرگ افراد کی نگہداشت انہیں باعزت ماحول فراہم کرنے کے لیے کی جانے والی کوششیں قابل تحسین ہیں، معاشرے کے مخیر افراد اور فلاحی اداروں کو چاہیے کہ وہ بزرگ شہریوں سمیت معاشرے کے مستحق کمزور طبقات کی فلاح و بہبود کے لیے اپنا کردار مزید مؤثر بنائیں۔

(جاری ہے)

انہوں نے کہا کہ بزرگوں کی دعائیں اور تجربات نوجوان نسل کے لیے قیمتی اثاثہ ہیں، ہمیں اپنے گھروں اور معاشرے میں بزرگوں کو عزت، محبت اور تحفظ فراہم کرنا چاہیے۔

ڈاکٹر فردوس عاشق اعوان نے تقریب کے دوران بزرگ شہریوں سے ملاقات بھی کی اور ان کے مسائل دریافت کیے۔سابق وفاقی وزیر نے شیڈ ٹرسٹ کی فلاحی خدمات کو سراہتے ہوئے کہا کہ دکھی انسانیت کی خدمت عظیم سماجی ذمہ داری ہے جس کے لیے معاشرے کے تمام طبقات کو مل کر کردار ادا کرنا چاہیے۔