مفتی طارق مسعود کے بیان پر شوبز شخصیات کا شدید ردعمل

ہر مرد کی چار شادیاں کروانا میرا مشن ہے کے وائرل بیان پر نادیہ جمیل سمیت متعدد فنکاروں کا اظہار تشویش

جمعرات 10 ستمبر 2026 14:10

مفتی طارق مسعود کے بیان پر شوبز شخصیات کا شدید ردعمل

کراچی (اُردو پوائنٹ اخبارتازہ ترین - این این آئی۔ 10 ستمبر2026ء) معروف مذہبی اسکالر مفتی طارق مسعود کے شادیوں سے متعلق وائرل بیان پر پاکستانی شوبز شخصیات اور سوشل میڈیا صارفین کی جانب سے شدید ردعمل سامنے آیا ہے، اداکارہ اور سماجی کارکن نادیہ جمیل نے بیان کو ’’انتہائی خطرناک‘‘ قرار دیتے ہوئے خواتین کو درپیش مسائل کے تناظر میں اس نوعیت کی گفتگو پر تشویش کا اظہار کیا ہے۔

سوشل میڈیا پر گردش کرنے والی ایک ویڈیو میں مفتی طارق مسعود مردوں کی چار شادیوں کی حوصلہ افزائی کرتے دکھائی دیتے ہیں۔ وائرل کلپ میں ان سے منسوب بیان کے مطابق ان کا کہنا ہے کہ ’’ہر مرد کی چار شادیاں کروانا میرا مشن ہے‘‘۔ویڈیو کے بعض دیگر ریمارکس، خصوصاً کم عمر لڑکیوں سے متعلق گفتگو، بھی سوشل میڈیا پر شدید تنقید کا باعث بن رہی ہے۔

(جاری ہے)

صارفین کی جانب سے بیان کے مختلف پہلوؤں پر تشویش کا اظہار کیا گیا ہے۔ڈیجیٹل مواد تخلیق کرنے والی اریج جمیل کی جانب سے شیئر کی گئی ویڈیو کو نادیہ جمیل نے اپنی انسٹاگرام کہانی پر دوبارہ شیئر کرتے ہوئے مفتی طارق مسعود کے بیان پر سخت ردعمل کا اظہار کیا۔نادیہ جمیل نے کہا کہ ایسے معاشرے میں جہاں خواتین کو تشدد، جنسی زیادتی اور قتل جیسے سنگین جرائم کا سامنا ہے، اس نوعیت کی گفتگو انتہائی خطرناک ثابت ہوسکتی ہے۔

انہوں نے اسے خواتین کے خلاف نفرت کو مزید ہوا دینے والی گفتگو قرار دیا۔مفتی طارق مسعود کے وائرل کلپ پر اداکارہ عائشہ عمر، متھیرا اور ڑالے سرحدی سمیت متعدد شوبز شخصیات اور سوشل میڈیا صارفین نے بھی غم و غصے اور تشویش کا اظہار کیا ہے۔بعض سوشل میڈیا صارفین نے وائرل بیان پر قانونی کارروائی کا مطالبہ بھی کیا، جبکہ دیگر نے خواتین کے حقوق، ازدواجی زندگی اور کم عمر افراد سے متعلق حساس معاملات پر ذمہ دارانہ گفتگو کی ضرورت پر زور دیا ہے۔