سرسید یونیورسٹی کے وفد کا ایس ایس یو ہیڈکوارٹرز کا دورہ

کراچی (اُردو پوائنٹ اخبارتازہ ترین - این این آئی۔ 10 ستمبر2026ء) سرسید یونیورسٹی آف انجینئرنگ اینڈ ٹیکنالوجی کے چانسلر محمد اکبر علی خان کی قیادت میں یونیورسٹی کے وفد نے اسپیشل سیکیورٹی یونٹ (ایس ایس یو) کے ہیڈکوارٹرز کا دورہ کیا، جہاں دونوں اداروں کے درمیان باہمی تعاون کے امکانات اور جدید سیکیورٹی ٹیکنالوجی کے استعمال پر تبادلہ خیال کیا گیا۔

وفد میں ارم اکبر علی خان، وائس چانسلر پروفیسر ڈاکٹر افضل حق، رجسٹرار کموڈور (ر) سید سرفراز علی، ڈاکٹر عبدالمعید خان، ڈاکٹر کاشف شیخ، ڈاکٹر فہد فاروقی، عدیل احمد، پیر شعیب سرہندی اور دیگر شامل تھے۔ایس ایس یو کے کمانڈنٹ کیپٹن (ر) عامر خان نیازی نے وفد کو یونٹ کی کارکردگی، تربیتی سرگرمیوں اور جدید اقدامات کے حوالے سے بریفنگ دی۔

(جاری ہے)

انہوں نے بتایا کہ ایس ایس یو کے سافٹ ویئر انجینئرز نے سیکیورٹی اور حفاظت سے متعلق سوالات کے جوابات فراہم کرنے والا جدید چیٹ بوٹ تیار کیا ہے، جبکہ مصنوعی ذہانت کے منصوبوں پر بھی کام جاری ہے۔

انہوں نے بتایا کہ آٹھ سے دس سافٹ ویئر انجینئرز پر مشتمل ٹیم مصنوعی ذہانت کے مختلف منصوبوں پر کام کر رہی ہے، جس کے تحت ایسا سافٹ ویئر بھی تیار کیا گیا ہے جو اردو، انگریزی اور سندھی زبانوں میں کام کرتا ہے۔ ان کے مطابق ایس ایس یو سے تقریباً 20 ریٹائرڈ فوجی افسران بھی وابستہ ہیں، جن کے تجربے اور مہارت سے استفادہ کیا جا رہا ہے۔اس موقع پر چانسلر محمد اکبر علی خان نے ایس ایس یو کی پیشہ ورانہ صلاحیتوں اور جدید ٹیکنالوجی کے استعمال کو سراہتے ہوئے کہا کہ یونٹ اہم شخصیات اور حساس تنصیبات کی حفاظت کے ساتھ کراچی میں امن و امان کے قیام میں بھی کردار ادا کر رہا ہے۔

انہوں نے کہا کہ ایس ایس یو کے تربیت یافتہ کمانڈوز اور جدید ٹیکنالوجی کے استعمال سے سیکیورٹی کے شعبے میں مؤثر اقدامات کیے جا رہے ہیں۔ انہوں نے مستقبل میں سرسید یونیورسٹی اور ایس ایس یو کے درمیان باہمی تعاون کو مزید فروغ دینے کی خواہش کا اظہار کیا۔ایس ایس پی ٹریننگ میجر سلیم نے وفد کو ایس ایس یو کی کارکردگی اور تربیتی نظام کے حوالے سے پریزنٹیشن دی۔

انہوں نے سیکھنے اور ذاتی حفاظت کی اہمیت پر زور دیتے ہوئے کہا کہ علم حاصل کرنے کی کوئی عمر نہیں ہوتی۔ اس موقع پر ہتھیاروں کے استعمال کا عملی مظاہرہ بھی کیا گیا اور حفاظتی اصولوں سے آگاہ کیا گیا۔دورے کے اختتام پر چانسلر محمد اکبر علی خان نے ایس ایس یو انتظامیہ کا شکریہ ادا کیا اور باہمی تعاون جاری رکھنے کی امید ظاہر کی۔ انہوں نے ایس ایس یو کے کمانڈنٹ کیپٹن (ر) عامر خان نیازی کو سرسید یونیورسٹی کا نشان بھی پیش کیا۔