عمران خان کو علاج کیلئے شفاء انٹرنیشنل ہسپتال منتقل کرنے کا آرڈر اب بھی برقرار ہے، سپریم کورٹ

آئینی عدالت صرف آئین کی تشریح کرسکتی ہے، دیگر تمام معاملات سپریم کورٹ کے پاس ہیں، آئین میں کہاں لکھا ہے کہ سپریم کورٹ سے مقدمہ لیا جا سکتا ہے؟ جسٹس شاہد وحید کا اٹارنی جنرل سے استفسار

ساجد علی بدھ 16 ستمبر 2026 12:31

عمران خان کو علاج کیلئے شفاء انٹرنیشنل ہسپتال منتقل کرنے کا آرڈر اب ..

اسلام آباد (اُردو پوائنٹ اخبارتازہ ترین۔ 16 ستمبر 2026ء) سپریم کورٹ میں بانی پی ٹی آئی عمران خان کو علاج معالجے کے لیے شفاء انٹرنیشنل ہسپتال منتقل کرنے اور عدالتی حکم پر عمل نہ کرنے پر توہینِ عدالت کی درخواستوں پر انتہائی سماعت ہوئی، جسٹس شاہد وحید کی سربراہی میں قائم تین رکنی بنچ نے واضح کیا ہے کہ عمران خان کو شفاء ہسپتال منتقل کرنے کا سپریم کورٹ کا حکم اب بھی برقرار ہے۔

اطلاعات کے مطابق سماعت کے آغاز پر پنجاب حکومت، وفاقی حکومت یا سپریٹنڈنٹ اڈیالہ جیل میں سے کوئی بھی سرکاری نمائندہ یا افسر عدالت میں پیش نہ ہوا، عدم پیشی پر برہمی کا اظہار کرتے ہوئے عدالت نے اٹارنی جنرل منصور عثمان اعوان کو فوری طور پر طلب کر لیا اور ان کے آنے تک سماعت میں عارضی وقفہ کردیا۔

(جاری ہے)

بتایا گیا ہے کہ وقفے کے بعد دوبارہ سماعت شروع ہوئی تو ایڈیشنل اٹارنی جنرل رانا اسد نے عدالت کو بتایا کہ ’گزشتہ روز وفاقی آئینی عدالت نے اس کیس کی فائل سپریم کورٹ سے اپنے پاس منگوانے کا حکم نامہ جاری کردیا ہے‘، عدالت نے ایڈیشنل اٹارنی جنرل کی استدعا پر اٹارنی جنرل منصور عثمان اعوان کو چیمبرز کے بعد پیش ہونے کی ہدایت کی، جس کے بعد اٹارنی جنرل کے بنچ کے سامنے آنے پر جسٹس شاہد وحید نے آئینی دائرہ اختیار اور دونوں اعلیٰ عدالتوں کی آئینی حدود پر سوالات اٹھائے۔

جسٹس شاہد وحید نے استفسار کیا کہ کیا سپریم کورٹ وفاقی آئینی عدالت کا حکم ماننے کی پابند ہے؟ ہم آئین کی اصل منشاء اور عدلیہ کے باہمی احترام کو سمجھنا چاہتے ہیں، آئینی عدالت کہتی ہے کہ وہ بنیادی حقوق کے کیسز کا تعین کرے گی لیکن شفاف ٹرائل سمیت بنیادی حقوق کا معاملہ تو ہر فوجداری مقدمے میں سامنے آتا ہے، وفاقی آئینی عدالت کا کام صرف آئین کی تشریح کرنا ہے، اس کے علاوہ تمام دیگر عدالتی و انتظامی امور سپریم کورٹ کے پاس ہیں۔

جسٹس شاہد وحید نے پوچھا کہ آئین میں آخر کہاں لکھا ہے کہ وفاقی آئینی عدالت سپریم کورٹ سے جاری مقدمہ بھی اپنے پاس منگوا سکتی ہے؟ سپریم کورٹ نے شفاء ہسپتال منتقل کرنے کے عدالتی فیصلے پر عملدرآمد نہ ہونے پر سخت ترین تشویش کا اظہار کیا، جسٹس شاہد وحید نے ریمارکس دیئے کہ عمران خان کا سرکاری یا پرائیویٹ ہسپتال میں ہو گا یہ نقطہ سائیڈ پر رکھ دیں، کیا سپریم کورٹ کے آرڈر کے باقی حصے پر عمل ہو رہا ہے؟ کیا عمران خان کی ملاقاتیں ہو رہی ہیں اور بچوں سے بات کرائی گئی؟۔

سپریم کورٹ کے بینچ نے ریمارکس دیئے کہ اڈیالہ جیل انتظامیہ کو آج ذاتی حیثیت میں طلب کیا گیا تھا، مگر کوئی افسر پیش نہیں ہوا جو کہ سپریم کورٹ کے فیصلے کی کھلی خلاف ورزی ہے، کیا سپریٹنڈنٹ اڈیالہ جیل کے عدم پیشی پر وارنٹ جاری کر دیں؟ عمران خان کی ہسپتال منتقلی کا سپریم کورٹ کا جاری کردہ آرڈر اپنی جگہ اب بھی نافذ اور برقرار ہے، بعد ازاں مزید سماعت 3 ہفتوں کیلئے ملتوی کردی گئی۔