Live Updates

کرسٹیانو رونالڈو کو النصر میں شمولیت کے بعد اپنی سب سے بڑی شکست کا سامنا

متحدہ عرب امارات کے کلب العین نے کرسٹیانو رونالڈوکے النصر فٹ بال کلب کو 0-4 سے ہرا دیا

بدھ 16 ستمبر 2026 15:41

ابوظہبی(اُردو پوائنٹ اخبارتازہ ترین - این این آئی۔ 16 ستمبر2026ء) کرسٹیانو رونالڈو کو النصر میں شمولیت کے بعد اپنی سب سے بڑی شکست کا سامنا کرنا پڑا ہے۔غیر ملکی میڈیا کے مطابق ایشین چیمپئنز لیگ ایلیٹ کے ابتدائی میچ میں متحدہ عرب امارات کے کلب العین نے کرسٹیانو رونالڈوکے النصر فٹ بال کلب کو 0-4 سے ہرا دیا۔ایشین چیمپئنز لیگ کا تاج اب تک حاصل نہ کرنے والی النصر کی ٹیم میچ کے 25 ویں منٹ میں خسارے میں چلی گئی جب حسین رحیمی نے العین کی جانب سے پہلا گول کیا۔

دو بار کی چیمپئن ٹیم العین کے اس مراکشی فارورڈ نے کھیل کے 60 ویں منٹ کے بعد اپنا دوسرا اور ٹیم کا بھی دوسرا گول داغ دیا۔حسین رحیمی کے بھائی سفیان رحیمی نے میچ ختم ہونے سے 18 منٹ قبل تیسرا گول کیا اس کے بعد جیورجیوس جیاکوماکس نے ایک گول کر کے مقابلہ 0-4 کر دیا۔

(جاری ہے)

اپنے کیریئر کے 980 ویں گول کی تلاش میں مصروف 41 سالہ کرسٹیانو رونالڈو کو میچ کے آخری لمحات میں ایک فری کک بھی ملی، جسے العین کے گول کیپر خالد عیسیٰ نے باآسانی روک لیا۔

اگست 2022 میں مانچسٹر یونائیٹڈ کی برینٹ فورڈ کے ہاتھوں 0-4 سے شکست کے بعد یہ کرسٹیانو رونالڈو کی موجودگی میں کسی ٹیم کی سب سے بڑی ناکامی ہے۔النصر کے کوچ اینج پوسٹیکوگلو نے کہا کہ کھلاڑیوں نے اچھا کھیل پیش کیا لیکن وہ اس شکست کی ساری ذمہ داری ان پر نہیں ڈالتے، اس تمام تر ناکامی کی ذمہ داری ان کی اپنی ہے اور بحیثیت مجموعی پوری ٹیم کی کارکردگی مزید بہتر بنانے کی ضرورت ہے۔

اس نتیجے کے بعد سعودی پرو لیگ کی اس اہم ٹیم کو آخری 4 میچوں میں صرف 1 کامیابی مل سکی ہے۔ دوسری جانب پہلے راؤنڈ میں سعودی عرب کے دیگر 5 کلبوں کے نتائج ملے جلے رہے، جہاں 4 بار کی چیمپئن الہلال نے قطر کے الغرافہ کلب کو 1-2 سے شکست دی، جبکہ الاہلی اور الاتحاد بالترتیب پاختاکور اور الشمال کے خلاف 1-1 سے ڈرا پر مجبور رہیں اور القادسیہ نے الوصل ک1-2 سے ہرا کر اپنی مہم کا آغاز کیا۔