Live Updates

ظالمانہ پٹرول لیوی نامنظور، پاسبان کا نیو کراچی ٹائون، یوپی موڑ پر احتجاج

بدھ 16 ستمبر 2026 21:04

کراچی (اُردو پوائنٹ اخبارتازہ ترین - این این آئی۔ 16 ستمبر2026ء) پٹرولیم مصنوعات پر عائد پٹرول لیوی کے خلاف پاسبان ڈیموکریٹک پارٹی کے زیر اہتمام نیو کراچی ٹائون، یوپی موڑ پر احتجاجی مظاہرہ کیا گیا، جس کی قیادت پاسبان کراچی کے صدر عبدالحاکم قائد نے کی۔ مظاہرے میں پاسبان سینٹرل کے عہدیداران اور کارکنان نے بڑی تعداد میں شرکت کی۔ مظاہرین نے ہاتھوں میں بینرز اٹھا رکھے تھے جن پرظالمانہ پٹرول لیوی نامنظور کے نعرے درج تھے۔

اس موقع پر کارکنان نے پٹرول لیوی اور عوام پر بڑھتے ہوئے معاشی بوجھ کے خلاف شدید نعرے بازی کی۔ مظاہرین سے خطاب کرتے ہوئے عبدالحاکم قائد نے کہا کہ پٹرولیم مصنوعات کی قیمتوں میں اضافے اور مختلف ٹیکسز و لیویز کا براہِ راست بوجھ عام شہری پر پڑتا ہے۔

(جاری ہے)

پٹرول مہنگا ہونے سے نہ صرف سفری اخراجات بلکہ اشیائے ضروریہ، کاروبار اور روزمرہ زندگی کے دیگر اخراجات بھی بڑھ جاتے ہیں۔

انہوں نے مطالبہ کیا کہ عوام کو ریلیف دینے کے لیے پٹرول لیوی اور دیگر اضافی بوجھ پر نظرثانی کی جائے ۔ مہنگائی سے متاثرہ شہریوں کو فوری ریلیف فراہم کیا جائے۔ مظاہرین میںسید رضوان الحق، رمضان راجپوت، بلال شیخ، محمد نعیم، سکندربلوچ،شاہ رخ، احسن، فہیم، سراج، معراج، جاوید و دیگر ورکرز بھی موجود تھے۔