عالمی یوم اساتذہ پر خصوصی لیکچرز کا انعقاد،استاد کی قوم ساز خدمات کو شاندار الفاظ میں خراج تحسین

لاہور (اُردو پوائنٹ اخبارتازہ ترین - این این آئی۔ 05 اکتوبر2026ء) اساتذہ قوم کے معمار اوربچوں کی سیرت کو سنوارنے، انہیں مستقبل کے چیلنجوں کا مقابلہ کرنے اور ان کی کردار سازی میں اہم ترین فریضہ سر انجام دیتے ہیں۔ اساتذہٴ کرام قوم کو مہذب بناتے ہیں اس لیے ان کا احترام سب پر فرض ہے۔ عالمی یوم اساتذہ منانے کا بنیادی مقصد معاشرے میں اساتذہ کے اہم کردار کو اجاگر کرنا نیز ان کی خدمات کو خراج تحسین پیش کرنا ہے۔

ان خیالات کااظہارمقررین نے ایوان کارکنان تحریک پاکستان اور ایوان قائداعظم ، لاہور میں ’’عالمی یوم اساتذہ‘‘ کے موقع پر منعقدہ خصوصی لیکچرز کے دوران کیا۔ ان لیکچرز کا اہتمام ادارہٴ نظریہٴ پاکستان نے تحریک پاکستان ورکرز ٹرسٹ کے اشتراک سے کیا تھا ۔

(جاری ہے)

سیکرٹری ادارہٴ نظریہٴ پاکستان ناہید عمران گل نے کہا کہ انسانیت کی تعمیر و علمی ارتقاء میں اساتذہ کا بنیادی کردار ہے ۔

اساتذہٴ کرام علم کے ذریعے اندھیروں میں اجالا کر کے درحقیقت تعمیر ملت کا فریضہ ادا کر رہے ہیں۔ قائداعظم محمد علی جناحؒ نے پاکستانی قوم کے لیے تعلیم کو زندگی اور موت کا مسئلہ قرار دیا تھا‘ لہٰذا ہمیں تعلیم کے فروغ کو اپنی پہلی ترجیح بنانا ہو گا۔ انہوں نے کہا کہ معاشرے میں مثبت رویوں کو فروغ دینے میں اساتذہ کا کردار بنیادی اہمیت رکھتا ہے۔

انہیں بچوں میں قومی سوچ پیدا کرنی چاہیے اور انہیں اجتماعی بھلائی کے کاموں کی ترغیب دینی چاہیے۔سیکرٹری تحریک پاکستان ورکرز ٹرسٹ محمد سیف اللہ چوہدری نے کہا کہ استاد بچوں کے آئیڈیل ہوتے ہیں‘ لہٰذا اساتذہ کو اپنی اہمیت کا ادراک کرنا چاہیے۔ انہیں بچوں کو مفید شہری بنانے کے لیے پوری یکسوئی سے تعلیم و تربیت کا فریضہ سرانجام دینا چاہیے۔

ہمارے اداروں نے ہمیشہ استاد کو عزت و احترام دیا اور ہماری سرگرمیوں میں اساتذہ باقاعدگی سے شر یک ہوتے ہیں۔ پروفیسر محمد سعید شیخ نے کہا کہ اساتذہٴ کرام کو اپنے پیشے پر فخر کرنا چاہیے کیوں کہ یہ پیشہٴ پیغمبری ہے۔ انہیں طلبہ کی اس طرح تربیت کرنی چاہیے کہ وہ روز قیامت کہہ سکیں کہ میرے طلبہ ہی میرے اعمال صالحہ ہیں جو فلاح انسانیت میں مصروف ہیں۔

عابد حسین شاہ نے کہا کہ تعلیم کا مطلب نامعلوم سے معلوم کی طرف سفر ہے جو اساتذہ کی رہنمائی میں طلبا وطالبات طے کرتے ہیں۔ زاہد جاوید شیخ نے کہااستاد کی حیثیت بچوں کے لیے لیڈر جیسی ہوتی ہے جو کامیابی کی منزل کی طرف ان کی رہنمائی کرتا ہے۔ محمد لطیف نظامی نے کہا اساتذہٴ کرام پر بھی لازم ہے کہ اپنے مقدس پیشے کی عظمت کا ادراک کریں کیوں کہ بچوں کی صورت قوم کا مستقبل ان کے ہاتھوں میں ہوتا ہے۔استاد کا ادب و احترام ہم سب پر لازم ہے۔