امریکا کی جانب سے شام پر مزید میزائل حملے

منگل 17 اپریل 2018 15:35

دمشق/واشنگٹن(اُردو پوائنٹ اخبار آن لائن۔ منگل 17 اپریل 2018ء)شام میں سرکاری ٹی وی نے ایک اعلان میں بتایا ہے کہ فضائی دفاعی نظام نے حمص صوبے کی فضاؤں میں آنے والے میزائلوں کو مار گرایا۔ ادھر امریکی وزارت دفاع پینٹاگون نے حمص میں کسی بھی امریکی عسکری کارروائی کی تردید کی ہے۔میڈیارپورٹس کے مطابق سرکاری ٹی وی اور بشار حکومت کے دیگر ذرائع ابلاغ نے کہاکہ مذکورہ میزائلوں کے ذریعے الشعیرات کے فضائی اڈے کو نشانہ بنانے کی کوشش کی گئی۔

تاہم یہ نہیں بتایا گیا کہ یہ حملہ کس نے کیا۔ یہ وہ ہی اڈّہ ہے جس پر گزشتہ برس امریکا نے 49 کے قریب میزائل داغے تھے۔ یہ امریکی کارروائی اِدلب کے قصبے خان شیخون میں کیمیائی حملے کے جواب میں سامنے آئی تھی۔

(جاری ہے)

شامی حکومت کے مقرب میڈیا کے مطابق حالیہ کارروائی میں 6 میزائل حمص کے نواح میں الشعیرات ہوائی اڈے پر گرے جب کہ 3 دیگر میزائل نے دمشق کے نواح میں الضمیر ہوائی اڈے کو نشانہ بنایا۔

دوسری جانب شام میں انسانی حقوق کے سب سے بڑے نگراں گروپ المرصد کے ڈائریکٹر رامی عبدالرحمن نے بتایا کہ حمص کے مشرقی نواح اور القلمون کے مشرقی نواح میں عینی شاہدین نے زور دار دھماکوں کی آوازیں سنیں۔شام میں ایرانی فورسز ہتھیاروں کی وصولی اور ان کی ملک کے دیگر علاقوں میں منتقلی کے لیے الشعیرات کے ہوائی اڈے پر انحصار کرتے ہیں۔