پنجاب کونسل آف دی آرٹس سرگودھا ڈویژن کے زیر اہتمام "پہلا پنجاب موسیقی مقابلہ 2024" کی تیاریاں

بھکر (اُردو پوائنٹ اخبارتازہ ترین - اے پی پی۔ 15 مئی2024ء) پنجاب کونسل آف دی آرٹس سرگودھا ڈویژن کے زیر اہتمام "پہلا پنجاب موسیقی مقابلہ 2024" منعقد کروایا جا رہا ہے۔سرگودھا ڈویژن کے ضلع خوشاب سے 18مئی سے پہلا پنجاب موسیقی مقابلے کا آغاز ہونے جارہا ہے جبکہ ضلع بھکر میں21مئی 2024 بروز منگل بمقام ضلع کونسل ہال بھکر بوقت 1بجے دن مقابلے کا انعقاد کیا جائے گا جس کے مہمان خصوصی ڈپٹی کمشنر علی اکبر بھنڈر ہونگے،جبکہ ضلع سرگودھا میں مقابلہ موسیقی 22مئی 2024 بروز بدھ بمقام سرگودھا آرٹس کونسل مین ہالز میں منعقد کیا جائے گا جس کے مہمان خصوصی ایگزیکٹو ڈائریکٹر پنجاب کونسل آف دی آرٹس سید بلال حیدر اور ڈپٹی کمشنر سرگودھا کیپٹن ریٹائرڈ اورنگزیب حیدر خان ہونگے۔

مقابلہ میں شرکت کے لیے امیدواران کی عمر 14 تا 30 سال مقرر ہے۔

(جاری ہے)

مقرر کی گئی عمر کا ہر شہری مقابلہ میں حصہ لے سکتا ہے۔مقابلہ میں عارفانہ کلام ،ملی نغمے ،لوک گیت، پاکستانی فلمی و غیر فلمی اور مروجہ موسیقی کی تمام اصناف گانے کی اجازت ہوگی۔ ضلعی سطح پر پوزیشن ہولڈر اول دوم اور سوم کو کیش انعام بالترتیب 20 ہزار 15 ہزار اور 10ہزار روپے دیئے جائیں گے اور23 مئی 2024 بروز جمعرات بمقام سرگودھا آرٹس کونسل کے مین ہالز میں بوقت 1بجے دن ضلعی سطح کے مقابلہ جات سے جیتنے والے امیدواران کے درمیان ڈویژن سطح کا مقابلہ منعقد کروایا جائے گا جس کے مہمان خصوصی کمشنر سرگودھا ڈویژن محمد اجمل بھٹی ہونگے۔

ڈویژنل سطح کے مقابلہ میں پوزیشن ہولڈر اول دوم اور سوم کو بالترتیب 40 ہزار ، 30 ہزار اور 20 ہزار کیش انعامات سے نوازا جائے گا۔ ڈویژنل سطح کے مقابلہ سے جیتنے والے امیدوار صوبائی سطح کے مقابلہ میں 22 جون 2024 بروز ہفتہ لاہور میں شرکت کریں گے۔ ضلعی اور ڈویژنل سطح کے مقابلہ جات میں ججز کے فرائض معروف سنگر گلوکارہ شبانہ کوثر، کامران عیسیٰ خیلوی اور معروف سنگر کاشف علی کےکے سر انجام دیں گے ۔\378