وزیر اعلیٰ گلگت بلتستان کا کیڈٹ کالج سکردو کی 19 ویں پاسنگ آؤٹ تقریب سے خطاب

گلگت (اُردو پوائنٹ اخبارتازہ ترین - اے پی پی۔ 25 مئی2024ء) وزیر اعلیٰ گلگت بلتستان حاجی گلبر خان نے کیڈٹ کالج سکردو کے 19 ویں پاسنگ آؤٹ تقریب سے خطاب کرتے ہوئے کہا ہے کہ آج کے اس پروقار تعلیمی ادارے میں بحیثیت مہمان خصوصی شریک ہونا ان کے لئے باعث افتخارہے۔ اس ادارے کا شمار ملک کے بہترین تعلیمی اداروں میں ہوتا ہے، انہیں قوی امید ہے کہ یہ سلسلہ جاری رہے گا۔

تعلیمی میدان میں اس کالج کی کارکردگی مثالی ہے اور کیڈٹس کی تربیت پر خصوصی توجہ دی جارہی ہے اوربحیثیت قوم ہمیں اسی طرح کے جذبے کی اشد ضرورت ہے۔ انہوں نے کہا کہ کالج انتظامیہ، اساتذہ ا ور تمام کیڈٹس کو اور پاس آؤٹ ہونے والے طلبہ اور ان کے والدین مبارک باد کے مستحق ہیں کہ آپ کے بچوں نے 5سال اس کالج میں کامیابی سے گزارے اور آج عملی زندگی میں قدم رکھنے کیلئے تیار ہیں۔

(جاری ہے)

انہوں نے کہا کہ ان کی دعا ہے کہ ان طلبہ کو زندگی کے ہر میدان میں کامیابی ملے اور یہ کالج مزید ترقی کی منزلیں طے کرے، وہ یقین دلاتے ہیں کہ کالج کی ترقی کےلئے ہر ممکن اقدامات کریں گے، اس لئے ہم نے کالج کی گرانٹ کو 20 کروڑ کردیا ہے۔ کالج کیلئے تین کروڑ روپے کی مالیت کا سولر سسٹم بھی منظورکیا ہے۔ کالج میں کلاسز کی کمی کو مدنظر رکھتے ہوئے 12 مزید نئی کلاسزکی جلد از جلد تعمیر کی منظوری دی ہے۔

کالج میں پینے کے صاف پانی کیلئے دو کروڑ روپے بورنگ کیلئے منظور کئے ہیں۔ بجلی کی فراہمی کےلئے کچورا سے ڈائریکٹ لائن کی بھی منظوری دی گئی ہے۔ کالج کیلئے جدید کمپیوٹر لیب قائم کریں گے جس میں 120 کمپیوٹرز فراہم کئے جائیں گے۔ کالج میں لیبارٹریز بلاک بنایا جائے گا جس میں تمام لیبارٹریز کا قیام جدید تعلیمی ضروریات کے مطابق کیا جائے گا۔ انہوں نے کہا کہ ان کا وعدہ ہے کہ ہم اپنے اس عظیم ادارے کوعظیم تر بنانے کی بھرپور کوشش کریں گے۔ اس موقع پر وزیر اعلیٰ نےپاسنگ آؤٹ پریڈ کا معائنہ کیا اور نمایاں پوزیشن حاصل کرنے والے کیڈٹس میں انعامات تقسیم کئے۔