کسانوں کو سہولت میسر کرنا حکومت کی اولین ترجیح ہے، حکومت فرٹیلائزر مینوفیکچررز ایڈوائزری کونسل کی تجویز ای سی سی میں لے جائے گی، رانا تنویر حسین

اسلام آباد (اُردو پوائنٹ اخبارتازہ ترین - اے پی پی۔ 15 مئی2024ء) وفاقی وزیر برائے صنعت و پیداوار رانا تنویر حسین نے کہا ہے کہ کسانوں کو سہولت میسر کرنا حکومت کی اولین ترجیح ہے، حکومت فرٹیلائزر مینوفیکچررز ایڈوائزری کونسل کی تجویز ای سی سی میں لے جائے گی۔ انہوں نے یہ بات منیجنگ ڈائریکٹر اور سی ای او فوجی فرٹیلائزر کمپنی جہانگیر پراچہ سے گفتگو کرتے ہوئے کہی جنہوں نے بدھ کو یہاں ان سے ملاقات کی۔

سی ای او فوجی فرٹیلائزر کمپنی جہانگیر پراچہ نے کہا کہ یوریا کھاد کی قیمتوں میں نمایاں کمی کے لئے تیار ہیں۔ انہوں نے تجویز دی کہ حکومت لاگو گیس کی قیمتوں کے تعین کی پالیسیوں کے مطابق تمام کھاد پلانٹس کو گیس صرف ماڑی گیس فیلڈ سے فراہم کرے، حکومت آئندہ 10 سال تک تمام فرٹیلائزر انڈسٹری کو گیس کی فراہمی کی یقین دہانی کرائے، کسانوں کے لئے سستی یوریا کھاد کی دستیابی کو یقینی بنایا جائے، اس سے یوریا کی درآمد پر زرمبادلہ کی بھی بچت ہوگی۔

(جاری ہے)

ایم ڈی ایف ایف سی نے کہا کہ کھاد کی صنعت کو حکومت سے کسی قسم کی سبسڈی کی ضرورت نہیں۔ انہوں نے تجویز دی کہ حکومت پورے پاکستان میں یوریا کھاد کی یکساں قیمتیں مقرر کرے، اس سے مڈل مین اور ایجنسیوں کی طرف سے منافع خوری ختم ہو جائے گی۔ وفاقی وزیر صنعت و پیداوار نے کہا کہ حکومت فرٹیلائزر مینوفیکچررز ایڈوائزری کونسل آف پاکستان کی تجویز ای سی سی میں لے جائے گی، کسانوں کو سہولت میسر کرنا حکومت کی اولین ترجیح ہے۔