سلام فیملی تکافل لمیٹڈ نے پہلے ڈیجیٹل اسلامی انشورنس کا لائسنس حاصل کرلیا

اسلام آباد (اُردو پوائنٹ اخبارتازہ ترین - اے پی پی۔ 16 مئی2024ء) سلام فیملی تکافل لمیٹڈ نے پہلے ڈیجیٹل اسلامی انشورنس کا لائسنس حاصل کرلیا۔ جمعرات کو یہاں جاری پریس ریلیز کے مطابق انقلابی حل پیش کرنے اور غیر معمولی اقدامات کے حوالے سے اپنی ساکھ کو بحال برقرار رکھتے ہوئے سلام تکافل لمیٹڈ نے نہ صرف پاکستان بلکہ دنیا بھر میں پہلی اور واحد ڈیجیٹل اسلامی انشورنس کمپنی سلام فیملی تکافل لمیٹڈ قائم کی۔

سیکورٹیز اینڈ ایکس چینج کمیشن آف پاکستان ( ایس ای سی پی ) کے چیئرمین عاکف سعید نے اہم لائسنس سلام تکافل شریعہ بورڈ کی موجودگی میں سلام تکافل کے ایم ڈی اور سی ای او رضوان حسین کے حوالے کیا جو اس بات کی غماضی کرتا ہے کہ نیا ادارہ، اس کے آپریشنز اور پیشکشیں اسلامی فقہ کی طرف سے توثیق شدہ ہیں اور شرعی اصولوں کے مطابق ہیں۔

(جاری ہے)

سلام تکافل لمیٹڈ کے ایم ڈی اور سی ای او رضوان حسین نے لائسنس کے حصول کو تاریخی کامیابی قرار دیتے ہوئے کہا کہ کمپنی ایس ای سی پی کی ہدایات کے مطابق انشورنس کے جدید اور بہترین ڈیجیٹل حل فراہم کرے گی۔

اس لائسنس کے ساتھ ہماری نئی کمپنی جلد نیا برانڈ متعارف کروائے گی جو نہ صرف صارف پر مبنی ہماری اقدار اور جدت سے ہم آہنگ ہوگی بلکہ گیم چینجر اسلامی لائف انشورنس اور سیونگز کی پیش کشیں پیش کی جائیں گی جو عالمی سطح پر اس سے پہلے انشورنس کے شعبہ میں نہیں دیکھی گئیں۔ ہم نے ایک جامع انفراسٹرکچر کی تشکیل میں کافی کام کیا ہے جو اپنی نوعیت کا پہلا ڈیجیٹل تکافل آپریٹر ہوگا اور ان شاء اللہ ہماری پروڈکٹس شاندار ڈیجیٹل تجربے فراہم کریں گی۔

آنے والے دنوں میں مزید تفصیلات متوقع ہیں، کمپنی کے ذرائع نے انکشاف کیا ہے کہ مارکیٹ میں دستیاب روایتی لائف انشورنس یا فیملی تکافل پروڈکٹس نہیں ہوں گی بلکہ پالیسی ہولڈرز کے فوائد اور بالکل منفرد فیچرز کے تناظر میں بہت زیادہ بہتر ہوگی جو ٹیکنالوجی اور رئیل ٹائم میں معلومات کے امتزاج کے ساتھ ایک مستند پیش کش ہوگی ۔ سلام فیملی تکافل لمیٹڈ ، سلام تکافل لمیٹڈ کا ذیلی ادارہ ہے ۔