تمام مذہبی اسکالرز اور مختلف رہنمائوں نے سرگودھا کے عوام سے شرپسند عناصر بالخصوص مقدس دستاویزات کو جلانے یا املاک کو نقصان پہنچانے والوں سے چوکنا رہنے کی اپیل کی ہے ،طاہر محمود اشرفی

اسلام آباد (اُردو پوائنٹ اخبارتازہ ترین - اے پی پی۔ 25 مئی2024ء) پاکستان علماء کونسل کے چیئرمین حافظ محمد طاہر محمود اشرفی نے کہا ہے کہ ملک بھر سے تمام مذہبی اسکالرز اور مختلف مکاتب فکر کے رہنمائوں نے سرگودھا کے عوام سے اپیل کی ہے کہ وہ شرپسند عناصر بالخصوص مقدس دستاویزات کو جلانے یا املاک کو نقصان پہنچانے کے ذمہ دار لوگوں سے چوکنا رہیں ۔

ہفتہ کواپنے ایک بیان میں انہوں نے اس بات پر زور دیا ہے کہ حکومت کو ایسے افراد کے خلاف کارروائی کرنی چاہیے، چاہے ان کا تعلق کسی بھی مذہب یا مسلک سے ہو۔طاہر محمود اشرفی نے سرگودھا میں مقامی انتظامیہ، مذہبی اسکالرز اور رہنماؤں کے ساتھ مکمل تعاون پر زور دیا اور اس بات کو اجاگر کیا کہ بعض عناصر مذہبی انتشار اور لسانی تقسیم کے ذریعے انتشار کو ہوا دے کر پاکستان کو غیر مستحکم کرنے کی کوشش کر رہے ہیں۔

(جاری ہے)

انہوں نے کہا کہ ان تفرقہ انگیز قوتوں کو شکست دینے کے لیے بین المذاہب ہم آہنگی کو فروغ دینا ضروری ہے۔انہوں نے کہا کہ مذہبی اسکالرز اور مذہبی رہنمائوں نے عوام سے اپیل کی ہے کہ وہ ہر قسم کی بغاوت، تشدد، فسادات سے گریز کریں اور سرگودھا میں مقامی انتظامیہ، علمائے کرام اور رہنماؤں کے ساتھ تعاون کریں۔حافظ طاہر محمود اشرفی نے کہا کہ پاکستان علماء کونسل کے رہنما اور بین الاقوامی بین المذاہب ہم آہنگی کونسل سرگودھا میں مسیحی رہنماؤں سمیت تمام مکاتب فکر کے مذہبی سکالرز سے رابطے میں ہیں اور وہ جلد ہی باہمی معاہدے کے ذریعے ایک مثبت اور واضح لائحہ عمل کا اعلان کریں گے۔