صوبہ بھر میں تاجروں کو درپیش مسائل کے حل کیلئے چیمبرز کا کردار نمایاں اہمیت کا حامل ہے، میاں انجم نثار

لاہور۔10 اگست(اُردو پوائنٹ اخبارتازہ ترین - اے پی پی۔ 10 اگست2018ء) نگران صوبائی وزیر صنعت ‘ تجارت و سرمایہ کاری میاں انجم نثار نے کہا ہے کہ صوبہ بھر میں تاجروں کو درپیش مسائل کے حل کے لئے چیمبرز کا کردار نمایاں اہمیت کا حامل ہے اور لاہور چیمبر سمیت تما م چیمبرز سرمایہ کاری کو فروغ دینے میں اپنا مرکزی کردار ادا کر رہے ہیں۔ ان خیالات کا اظہار نگران صوبائی وزیر نے جہلم چیمبر آف کامرس کے وفد سے ایک ملاقات کے دوران کیا۔

وفد کی سربراہی صدر چیمبر آف کامرس جہلم فرحان ڈار نے کی۔وفد نے صوبائی وزیر کو بتایا کہ جہلم میں چیمبر آفس کے لئے نئی مناسب جگہ درکار ہے جبکہ سب سے بڑا مسئلہ انڈسٹری کو گیس کی فراہمی ہے ،گیس کی عدم فراہمی کے باعث چیمبر سے منسلک 200چھوٹی انڈسٹریز کافی مسائل کا شکار ہیں،اس حوالے سے ڈائون پیمنٹ بھی جمع کرا چکے ہیں مگرتا حال گیس کی دستیابی ممکن نہیں ہو سکی۔

(جاری ہے)

صوبائی وزیر میاں انجم نثار نے کہا کی قدرتی گیس کی فراہمی تو جاری ہے مگر انڈسٹری کو ایل این جی گیس کی فراہمی یقینی بنانے کے لئے اقدامات کئے جا رہے ہیں۔ انہوں نے کہا کہ آج ہی متعلقہ ڈی سی کو لیٹر لکھ دیتے ہیں کہ چیمبر کی نئی عمارت کے لئے 04کنال اراضی کا انتظام یقینی بنایا جائے کیونکہ چیمبرز درحقیقت ویلفیئر کا کام کر رہے ہیں اور حکومت ہر سطح پر انڈسٹری کا تحفظ یقینی بنانے کیلئے تمام اسٹیک ہولڈرز کو ساتھ لیکر چلنے کی خواہاں ہے۔