یونیورسٹیزکی عالمی درجہ بندی، انجینئرنگ وٹیکنالوجی کے میدان میں یوای ٹی دنیا کی 250 بہترین جامعات میں شامل

لاہور (اُردو پوائنٹ اخبارتازہ ترین - این این آئی۔ 22 اپریل2024ء) یونیورسٹی آف انجینئرنگ اینڈ ٹیکنالوجی (یو ای ٹی) لاہور کی عالمی درجہ بندی میں نمایاں ترقی،کیو ایس ورلڈ یونیورسٹی رینکنگزکی تازہ ترین فہرست کے مطابق یو ای ٹی رواں سال 791-800کی حد تک پہنچ گئی ہے جو کہ 2023میں 801-1000نمبر پر تھی۔ ترجمان کے مطابق یو ای ٹی لاہور نے، 1500عالمی یونیورسٹیوں جبکہ 14پاکستانی نامزدیونیورسٹیوں میں سے، تعلیمی معیارات کو بلند کرنے اور انجینئرنگ و ٹیکنالوجی کے شعبے میں اپنی معروفیت کو مضبوط بنانے کی لگن کے ساتھ قابل ذکر پیشرفت کی ہے۔

یو ای ٹی لاہور نے کیو ایس ورلڈ یونیورسٹی رینکنگز بائے سبجیکٹ میں بھی شاندار کامیابی حاصل کی ہے۔ انجینئرنگ اور ٹیکنالوجی کے میدان میں، یو ای ٹی لاہور نے پاکستان کی 14یونیورسٹیوں میں سرفہرست رہتے ہوئے، 236ویں پوزیشن حاصل کی ہے، جو کہ پچھلے سال کی 279ویں پوزیشن سے 43مقامات کی بہتری ہے۔

(جاری ہے)

اس کے علاوہ، کیو ایس ایشیا یونیورسٹیز رینکنگ میں یو ای ٹی لاہور نے اپنی گزشتہ سال کی 179ویں پوزیشن برقرار رکھی ہے۔

تازہ ترین کیو ایس رینکنگ کے اعداد و شمار کے مطابق، یو ای ٹی نے 2023کے مقابلے میں اپنے سبجیکٹ کے لحاظ سے عالمی درجہ بندی میں کافی بہتری کی ہی:رواں برس یو ای ٹی الیکٹریکل اور الیکٹرانک انجینئرنگ میں 201-250نمبر پر ہے جبکہ گزشتہ سال 251-300کے نمبرپر تھی اسی طرح مکینیکل انجینئرنگ اور کمپیوٹر سائنس اور انفارمیشن سسٹم میں گزشتہ برس کی طرح 251-300اور 401-450نمبر پر ہی رہی۔

یو ای ٹی نے ریاضی کے ڈومینز میں 501-550کی رینکنگ کے ساتھ، بزنس اینڈ مینجمنٹ اسٹڈیز میں 601-620کی رینکنگ، اور فزکس اور فلکیات میں 601-640کی رینکنگ رینج کے ساتھ پہلی بار رینکنگ حاصل کی ہے۔رینکنگ میں یو ای ٹی لاہور کا قابل ستائش اضافہ STEMمیں عمدگی اور جدت طرازی کے عزم کی نشاندہی کرتا ہے جس سے نہ صرف پاکستان بلکہ عالمی سطح پر ایک سرکردہ ادارے کے طور پر اس کی ساکھ کو مستحکم کیا گیا ہے۔یو ای ٹی لاہور کی یہ ترقی اس کی تعلیمی شانداری اور جدت طرازی کی سمت میں عزم کی عکاسی کرتی ہے، جو اسے نہ صرف پاکستان بلکہ عالمی سطح پر بھی ایک معروف تعلیمی ادارہ بناتی ہے۔